Punjab leh Mohun Bagan inhnehtawk

Substitute Subha Ghosh-a'n Mohun Bagan chhanhimin nimin tlai khan Kolkata club leh Punjab FC 1-1 in an inhnehtawk. Guru Nanak Stadium-a inkhelah mualneitu Punjab-in Aser Pierrick Dipanda Dicka hmangin minute 20-naah hma an hruai a, Mariners-in Ghosh hmangin minute 87-naah an sut.

Nimin inkhel dangah Neroca chuan an mual Khuman Lampak Main Stadium-ah Real Kashmir 1-0 in an hneh a, goal awmchhun hi Boubacar Siaka Diarra-a'n minute 64-naah a khung. Vawiin tlai dar 5:00 hian East Bengal leh Gokulam Kerala te Kalyani Stadium-ah an inkhel ang.

Mohun Bagan-in ṭan phat aṭangin an nawr na nghal a, goal erawh Minerva Punjab-in an khung hmasa thung. Corner kick-ah Sanju Pradhan-a'n Samuel Shadap pein Shillong Lajong player hlui cross ṭha tak chu Aser Pierrick Dipanda Dicka-a'n a volley goal. Dicka hian a club hlui lama khung ni mah se inthlahrung hauh loin a goal khung a lawm.

Mariners-in na takin an nawr chhunzawm a, goal chance ṭha erawh an nei thei lo. Spanish midfielder  Joseba Beitia-a'n ṭum dang a pha lo a, a hun ṭha neih a bawhpelh. Minute 83-naah rawlthar duhawm  Subha Ghosh luhtir a ni a, Calcutta Football League-ah pawh hming chhher tawh Ghosh hian minute li hnuah siphurh sutna goal a khung.

Neroca pawhin point thum hlu tak an hlawh chhuak a, Gift Raikhan-a hote tan hian Malian forward Boubacar Diarra-a'n minute 64-naah goal awmchhun a khung. NorthEast club pathum Aizawl FC, Neroca leh Trau ten match sarih khelhah point riat ṭheuh an hmu a ni.

Nimin Inkhel Results

Punjab 1-1 Mohun Bagan

PFC : Aser Pierrick Dipanda Dicka 20'

MB : Subha Ghosh 87'

Neroca 1 - 0 Real Kashmir

NER : Boubacar Siaka Diarra 64'

Vawiin Inkhel Tur

Quess East Bengal 5:00 PM Gokulam Kerala FC