Salt Lake-ah I League champion Aizawl FC
Aizawl FC-in I League nomawi humhim tumin zanin hian Salt Lake Stadium-ah an match hmasa ber an khel dawn. Mizo club hian season liam taa an bul ṭanna East Bengal nen an inhmachhawn dawn a, inkhel hi Star Sports 2-ah a en theih ang.
Nikum kha
AIFF thuneitu duhsakna changin Aizawl FC-in I League an khel nawn a, chapona leh uanna tur nei miah loin January 7, 2017 khan Barasat Stadium-ah lenglutin India ram club East Bengal an tlawh.
Mumbai FC duh loh Khalid Jamil hnuaia bul ṭan Mizo club-in India ram football ngainatute barakhaihin point khat hlu tak an hlawh chhuak a, a hunlai khan champion kawng inṭanna a ni dawn tih ring pha reng an awm lo.
Khalid-a hoin
East Bengal-in an muala Mizo club an hneh zawh loh hnuah Aizawlah an tlawm zui a, I League nomawi chawi duha tuihal club-in thil thar an ngaihtuah thei lo a, ṭha sa an duh.
Red and Gold hian AFC champion puitu coach Khalid an chhuhsak hnuah Mizo pathum Lalramchullova, R. Laldanmawia leh Brandon VL Remdika te bakah Syrian midfielder Mahmoud Al Amna ten champion puitu coach hi an zui bawk.
Kolkata club hian champion ngei tumin an hmelma Mohun Bagan aṭangin Japanese midfielder Katsumi Yusa leh Brazil-a piang Equatoguinean defender Eduardo Ferreira te an la bawk a; an foreigner pahnih dang pawh India rama tawnhriat nei sa Willis Plaza leh Charles (Chennai City) te an ni a, Ivory Coast player Armand Bazzaou chiah mi thar an kawl.
Khalid hian Calcutta Football League-ah Red and Gold hi a champion pui tawh a, amaherawhchu club neitute duh chu I League nomawi chawi a ni a, Aizawl FC hmaah fiahin an awm ang.
Salt Lake Stadium
East Bengal-in home match an khelhna Salt Lake Stadium hi FIFA Under 17 World Cup final khelhna hmuh kha a ni a, India rama stadium ṭha ber zinga mi a ni.
I League club Red and Gold leh Mohun Bagan ten West Bengal sorkar duhsakna dawngin stadium hman man chawi loin tihfai nan erawh Rs 15,000 an pe dawn a. ISL club Atletico de Kolkata erawhin Salt Lake Stadium hmang tur hian nuai 16 zet an seng thung.
ATK chief coach Teddy Sheringham chuan Salt Lake-ah training an phal loh avangin neutral ground ang mai a nih thu a sawi tawh a, East Bengal pawh an practice theih bik loh avangin ISL club tan an muala khelh hi a har ve tho ang.
East Bengal boss Khalid Jamil hi Mumbai FC a enkawl lai aṭang tawha mahni mual hmang thiama sawi a ni a, season khat chhung Aizawl FC a enkawl ṭum pawhin Bengaluru FC nen an inhnehtawk tih loh chu an chak fai vek.
Andrei tel loin
Aizawl FC-in I League inpuahchahna atan MPL an hmang a, hei hi team dang nena an danglamna tur a ni. Amaherawhchu, Ramhlun North nena an inkhelh ṭumin Andrei Ionescu a inhliam a, Romanian midfielder hian MPL semifinal first leg a khelh theih loh hnuah training a la zawm theih loh avangin a la inlan lo ang.
Portuguese coach Paulo Meneses chuan, "Andrei hian training tumin bei mah se a la tilui thei lo a, kan chhawr theih ka ring lo. East Bengal hian training-na hmun min pe ṭha lo a, ground chhiat vangin Sena a inhliam phah bawk," tiin a lungawi loh thu Vanglaini a hrilh.
Aizawl FC hian Andrei chhawr thei lo mah se foreigner panga dang an la nei a, coach Meneses chuan chhawr vek a tum tih a sawi bawk.
I League champion lai hian MPL-ah foreigner pahnih chauh hmang thei mah se ISL club Chennaiyin FC nen friendly match an khelh ṭumin an chhawr vek thei a, inrintawkna an neih phah ang.
AFC boss Meneses chuan, "Mizo mipui ṭanpuina kan beisei a, season liam ta pawh kha Mizo mipui nena thawhhona ṭhat zar a nih thu min hrilhtu an tam a, ka pawm zawng tak a ni. East Bengal nen pawh hian result ṭha rawn hawn ngei kan tum a, chak tumin kan khel ang," tiin Kolkata club lian a hlauh bik loh thu a sawi.
AFC Squad
GOALKEEPER : Lalawmpuia, Avilash Paul, Arup Debnath
DEFENDER : Lalramhmunmawia, Lalhriatrenga, Lalrinzuala Khiangte, Lalrozama Fanai, Masih Saighani, Kareem Omolaja Nurain
MIDFIELDER : H. Lalbiakthanga, David Lalrinmuana, Alfred Kemah Jaryan, F. Liandala Sena, Lalṭhathanga Khawlhring, Albert Zohmingmawia, H. Lalmuankima, Leonce Dodoz Zikahi, Andrei Ionescu
FORWARD : William Lalnunfela, Yugo Kobayashi
TEAM OFFICIAL : Hmingthansanga (Manager), Paulo Jorge Menezes (Coach), Izan Martin Andres (Asst Coach), RK Zothanpuia (Physio)