A tawpah Arsenal leh City an an nui

Hun pek belhah Arsenal tan Alexis Sanchez chuan penalty sawi hlawh tak khungin Burnley lakah si khat faiin hnehna an chang. Pathianni zan Premier League inkhel pakhat zawkah hmahruaitu Manchester City chuan hun tawp dawna Raheem Sterling goal khung hmangin kai thar Huddersfield 2-1 in an luhchhuah bawk.

Pep Guardiola enkawl Manchester City hian league match 13 khelhah point 37 hmuin Premier League season tir lama point hmu hnem ber record an siam a; Arsenal pawhin an elpui Tottenham lehpelin a sang pali zing­ah hmun an chang ve leh ta a ni.

A tawpah

Season hmasa khan Emirates Stadium-ah Sanchez hian minute 98-naah penalty chhuih lutin Arsenal hi hnehna a chanpui tawh bawk a, Burnley hmaah Gunners-in a zawna vawi thum hun tawp dawna an goal khung an chakpuina chiah a ni ta.

Turf Moor-a inkhelah Burnley player an tlan tam a, mawi leh rang tak takin ball an inpe kual thei. Iceland international Johann Berg Gudmundsson-a'n ṭum hnih Petr Cech a fiah; Arsenal keeper hian ṭha zeta a dan sak bakah winger Robbie Brady-a free kick pet chu ropui takin a dang bawk.

Arsenal hian dam lohna vangin Mesut Ozil an chhawr thei lo a, Alexandre Lacazette leh Aaron Ramsey ten a hmawr an bawk fuh theih loh avangin khualmuala point li chiah la hmu Arsenal laipui a puak lo tlang dawna ngaih a ni hman.

Minute 90 chhungin goal a lut lo a, minute hnih pek belh a ni. Hun pek belhah defender James Tarkowski chuan Ramsey nam thluin penalty a chawi - Chile international Sanchez-a'n Burnley a hmachhawn hnuhnung pangaa a goal lina khung nan a hmang.

Hmuh dan inang lo

Burnley manager Sean Dyche chuan penal­ty an chawi chu awm lo a tih thu sawiin, "Min rawk a ni ber mai, vawiin ang inkhel inhnehtawk leh boruak sangah kha chuan penalty tur a ni lo," tiin referee Lee Mason thutlukna an tawrh thu a sawi a, midang pawhin awm lo an tih vek a rin thu a sawi bawk.

Hetihlai hian Arsenal manager Arsene Wenger chuan, "Khelmual pawn aṭanga lo entu tan chuan 100% penalty a ni. Ramsey kha a hnunglam aṭanga nam thluk a ni, ennawn leh ngei pawh ka duh," a ti.

Arsenal tan hian Sanchez leh Lacazette ten league match rukah inkhel bul an ṭan dun tawh a, hengah hian hnehna an chang vek. Manchester khaw club pahnih bakah champion lai Chelsea te chiah an tluk loh an ni ta.

Wenger chuan, "Khualmuala hnehna chan kha kan tum a ni a, kan duh chu kan ti hlawhtling thei, chhunzawm zel kan tum ang," a ti. Arsenal hian Nilaini zanah Huddersfield an mikhual dawn a, Burnley hi Bournemouth khelmualah an lenglut thung ang.

Champion tum City

Manchester City manager Pep Guardiola chuan Huddersfield lakah hnehna an chan dan chu ropui a tih thu a sawi a, champion tur chuan kawng awlsam zawh theih a nih loh thu a sawi tel bawk.

League hmahruaitu Man City hi defen­der Nicolas Otamendi own goal vangin chawlh­lawk laiin si khat faiin an hnufual zawk. Second half ṭantirah Sergio Aguero-a'n penalty aṭanga sutin hun tawp dawnah substitute Gabriel Jesus thawhrah sengin Sterling chuan tun season-a a league goal riatna a khung.

Hneh loh nei loa season hmang mek City hian a zawnin Premier League bikah match 11 hnehna an chang ta a, kum 2015-a record an lo siam tawh chu an nihrual chiah; khualmualah bik kum 1995 April thla hnuah chawlhlawk laia si an phurh hnua hnehna an chan let leh theih hmasak ber ṭum an tawng.

City manager Guardiola chuan, "Champion nomawi chawi kan duh a nih chuan inkhel awlsam kan beisei thiang lo. Hun harsa kan paltlang a ngai tih kan hria, chawlhlawk lai khan kan goal phurh sut leh chakna goal kan khung theih dan tur kha kan ngaihtuahin kan sawi bawk a ni," a ti.

August 21 khan City hi Everton nen 1-1 in an inhnehtawk a, hemi hnuah inelna hrang hrangah match 18 khelin hnehna an chang fai vek; league table-ah United aiin point riatin an sang fal tawh.