MPL6-ah tu nge top scorer dawn? Fakzuala nge Valpuia

Football tihmuhnawmtu chu goal a ni a, Mizoram Premier League Season 6-ah Lalfakzuala'n goal 10 khung tling tawhin top scorer a ni mek. Armed Veng tlangval Fakzuala elpha tura ngaih chu Mizoram Police tana a khelhpui F. Lalrinpuia a ni a, Valpuia hian goal 9 a khung ve tawh bawk.

MPL6-ah match thum - semifinal second leg leh final bak khelh tur a awm tawh lo. Mizoram chhunga football inelna sang ber MPL tawp lam a hmuhnawm ang bawkin a ngaihnawm chho hle.

Goal 179

MPL6 match 58 khelh tawh aṭangin goal 179 a lut tawh a, match tina goal 3.09 lut ang a ni. Tun season hian season liam taa goal lut zat 147 chu goal 32 zetin a khum tawh a, MPL-a goal luh tam ber

ṭum MPL3 (191) erawh match thum khelh tur la awmah goal 12 zetin a la pha lo.

Tun season hian MPL1 (150) leh MPL2 (170) te a khum tawh a, MPL4-a goal lut zat goal 183 pawh match thum khelh tur a la awm avangin a khum chhoh ngei a rinawm bawk.

Top scorer chu

Season ṭan tirh lamah Police tlarhnung pawp nasatzia chu uar taka sawi a ni a, MPL6-ah ringawt goal 38 an chhuah tawh. Heti chung hian Mizoram Police hian semifinal an thleng thei a, an tlarhma hriam vang a ni.

Police hian goal 35 an khung tawh a, MPL club zinga goal khung tam ber an ni. Lalbiaksanga Colney hote tan Fakzuala'n goal 10 khung tawhin ṭum hnih hattrick a siam a, MPL season nga a khelh tawh aṭangin goal 24 a khung tawh bawk.

Republic Veng tlangval Valpuia hian MPL4-a Aizawl FC tana a khelh ṭumin goal 13 a khung a, season khata goal khung tam ber a la ni. Police forward Valpuia hian Police relegate vanga MPL5 an khel lo chungin MPL-ah ringawt goal 40 a khung tling tawh a, a record hi a chhuanawm hle.

Police forward pa­hnih elpha tura ngaih chu Malsawmfela a ni a, amah­erawhchu Chhinga Veng forward hi a vanduai a kal­tluang. League round chaw­hnu lamah Sawmfela'n goal a khung tawh lo a, semifinal first leg-a Chanmari FC an hmachhawn ṭum pawhin chance ṭhahnem tak a hlah bawk.

Chutihrualin goal ruk khung tawh Sawmfela thai bo erawh a la rem lo, Chhinga Veng striker hian MFA Super Cup top scorer ni turin final-ah hattrick a siam tih theihngilh loh a ṭha.

November 30, Ningani zan hian Chhinga Veng FC leh Chanmari FC ten semifinal second leg an khel dawn a, Mizoram Police leh Aizawl FC ten December 4 zanah minute 90 dang an khel leh ang.