Indian Super League-ah goal a sur

Pathianni zan khan Indian Super League-ah inkhel pahnih a awm a, goal 10 ngawt a lut! Bengaluru-in ISL-a an season hmasa berah Indian football-a an mikhual lohzia an pholang nghal a, an match hnihnaa an vawi hnih chakna ni turin Delhi Dynamos chu 4-1 ngawtin an sawp.

Atletico de Kolkata-in season hmasaa Salt Lake Stadium an hman theih loh hnuah Kolkata Stadium hmingthang an hmang thei leh tawh a, mah se anmahni mualah ngei Pune City chuan 4-1 ngawta inkhelh zirtirin an mualpho chuang hle.

Bengaluru boss Albert Roca hnuaiah Mizoin hmun pawimawh an la chang thei rih lo a, Chaltlang rawlthar Malsawmzuala'n bench lamah hun a hmang tih loh chu Mizo hmel hmuh tur a awm lo - mikhual team Delhi Dynamos tan erawh Lalhmangaihsanga Ralte leh Lallianzuala Chhangte ten inkhel bul an ṭan a, an mualpho tur erawh an khuh zo bik chuang lo.

I League club ṭhin Bengaluru tan an player langsar chu Erik Paartalu a ni a, Melbourne City midfielder hlui hian goal hnih ngawt a khung. Bangalore club tan hian Erik bakah Goan midfielder Lenny Rodrigues leh Venezuela international Miku te chuan goal khat ve ve an thawh ve bawk a, penalty aṭanga Delhi tana Kalu Uche goal khung chu mualpho zualpui tur khuhna chauh a ni tawh.

Atletico de Kolkata leh Pune City inkhelah Maharashtra club tan Lalchhuanmawia Fanai leh Isaac Vanmalsawma ten inkhel bul an ṭan a, Chhuantea tan match hniha inkhel bul a vawi hnih ṭanna a nih laiin tun season aṭanga ISL khel ṭan ve chauh Isaac tan erawh ISL-a a hmel a inlan hmasak ber a ni thung - a khel chhe lo.

Pune tan hian Brazilian striker Marcelinho chuan goal hnih ngawt a khung a, Rohit Kumar leh Emiliano Alfaro ten an khung ve bawk. ATK goal neihchhun hi si khat chauh an phurh laia Bipin Singh-a'n freekick aṭanga mawi taka a chhuih luh a ni a, a mawina erawh Pune goal thum dangin a hliahkhuh chhunzawm.

Zaninah ISL inkhel a awm dawn lo a, Nilaini zanah Pune City leh Mumbai City te an inkhel ang.

Mimal Lawmman
Bengaluru FC 4 - 1 Delhi Dynamos
Swift moment of the match Lenny Rodrigues, Bengaluru FC
Winning pass of the match Harmanjot Khabra, Bengaluru FC
Emerging player of the match Vinit Rai, Delhi Dynamos
Fittest player of the match Udanta Singh, Bengaluru FC
Hero of the match Erik Paartalu, Bengaluru FC

Atletico de Kolkata 1 - 4 Pune City
Swift Moment of the match Rohit Kumar, Pune City
Winning Pass of the match Emiliano Alfarom, Pune City
Fittest Player of the match Zequinham, Atletico de Kolkata
Emerging Player of the match Bipin Singh, Atletico de Kolkata
Hero of the Match Marcelinho, Pune City