City ûm tum United leh Spurs
Zaninah Premier League khelh chhunzawm a ni dawn. Manchester United-in Vicarage Road-ah Watford an tlawh ang a, Tottenham Hotspur-in King Power Stadium-ah Leicester City an lenchilh bawk ang.
United hian point 29 hmuin league-ah pahnihnaah an awm a, Spurs hi point 24 hmuin panganaah an awm thung. Jose Mourinho leh Mauricio Pochettino hote hian point 37 hmu chunga hmahruaitu Manchester City an um chho mek.
Kan inhlat - Poch
Tottenham-in Wembley Stadium-ah Harry Kane hmangin West Brom 1-1 in an draw hram a, Spurs boss Mauricio Pochettino chuan City nen an inkar a zau tawh thu a zep lo.
Argentine manager Poch chuan, "City nen kan inthlau ta hle, point 10 chuanga inhlat hi chu Premier League-ah chuan a tam a ni," tiin champion harsat tur thu a sawi. Season tira chhuah duh Danny Rose chu squad-ah match hnih a zawnin a awm tawh lo a, Spurs boss hian an inkarah buaina a awm loh thu a sawi thung.
Spurs hian White Hart Lane an sak ṭhat avangin Wembley Stadium chu home match khelh nan an hmang a, tun season-ah Burnley, Swansea leh West Brom te lakah point an hloh tawh a, an hmang thiam tawk lo. Poch pawhin, "Zep tur a awm lo. White Hart Lane nen a inang lo. Kan stadium sak zawh hun hi kan nghakhlel a, chhuanlam siam erawh a thiang lo. Hmasawn tuma kan match hmabak kan khelh a ṭul a ni," tiin chetsual a thiang tawh loh thu a sawi.
Tottenham-in City nena an inkar tih zim an tum a nih chuan zaninah Leicester an hneh a ṭul a, Wembley Stadium-ah result ṭha an neih tam tawk loh avangin King Power Stadium-a an inkhel tur hi thu lawmawm a tih thei hial ang.
Lukaku a buai!
Belgian striker Romelu Lukaku-a'n Everton aṭanga Manchester United a zawm hnuah match 20 aṭangin goal 12 a khung a, record chhia niin lang lo mah se match hnuhnung 10-ah goal khat chiah a khung. Kum 24 mi Lukaku hian goal khung kawngah harsatna a nei mek a, Brighton and Hove an hmachhawn ṭuma defender Gaetan Bong a tlawh avangin match thum khel thei lo tura hrem theih dinhmunah a ding mek.
Lukaku hi an hrem a nih chuan zanina Watford nen an inkhelh tur bakah Arsenal leh Manchester City an hmachhawn hunah a inlan thei lo ang. Amaherawhchu tunah chuan Zlatan Ibrahimovic a dam tawh a, Belgian striker a awm lo a nih pawhin Jose Mourinho tan lu haina tur niin a lang tawh lo.
Zlatan hi bench aṭangin ṭum thum a lut tawh a, Swede forward hi a inlan tawh chuan khelmual chhungah hmun pawimawh a chang nghal a, target man atana lakluh Lukaku chu mual sir lamah tlantir a ni thung. United ṭantu tana hriat nuam lo tur erawh Ibrahimovic hian tun season-ah goal a la khung lo!
United khingpui tur Watford hi tun season-a team ṭha ber zinga mi an ni a, Marco Silva hote hian kartawp khan Newcastle 3-0 laiin an sawp. Portuguese coach Silva chuan, "Inrintawkna nei turin chak hi a pawimawh a, Manchester United nena inkhelh hmaa chak hi a hlu lehzual," tiin United hmachhawn turin rilru lam nena an inpeih thu a sawi.
Zanin Inkhel Tur
Brighton & Hove 1:15 AM Crystal Palace
Leicester City 1:15 AM Tottenham Hotspur
Watford 1:30 AM Manchester United
West Brom 1:30 AM Newcastle United
November 29, Nilai zan
AFC Bournemouth 1:15 AM Burnley
Arsenal 1:15 AM Huddersfield Town
Chelsea 1:15 AM Swansea City
Everton 1:30 AM West Ham United
Manchester City 1:30 AM Southampton
Stoke City 1:30 AM Liverpool