Davis Cup champion France

Ram leh ram mipa tennis team hmanga inelna Davis Cup final chu Pathianni zan kan khelh zawh a ni a, France chuan Belgium lakah 3-2 a hnehna changin a vawi 10 nan an champion.

Pierre Mauroy stadium, Lille-ah Zirtawpni zan aṭang khan final hi khelh ṭan a ni a, best of five hmanga chak zawk zawn a nih avangin Pathianni zan inkhel hmain France hian 2-1 in hma an hruai. Belgium tan David Goffin chuan Jo-Wilfried Tsonga lakah 7-6 (7-5), 6-3, 6-2 a hnehna changin 2-2 chiah a ni.

Chak zawk hre turin singles match pawimawh khelh zui a ni, France tlangval Lucas Pouille chuan world number 76 Steve Darcis lakah 6-3, 6-1, 6-0 a hnehna changin an ram a championpui.

France hian Davis Cup hi vawi 10 lai chawi tawh mah se kum 2001 hnua an chawi lehna hmasa ber a ni thung. Kum 2002, 2010 leh 2014 te khan final lut vek mah se a chak lo zawkah an ṭang ziah, vawi thum an hlawhchham hnuah hlim ni an tawng ve leh ta a ni.

World number 18 Pouille chuan, "Jo a chak loh chiah kha chuan rilru a buaiin ka hlauthawng hle, ka zam a ni. Ka rilru ka ti paukhauh lui a, huaisen takin ram tan khelh a ngai tih ka hria, hnehna chan tumin court ka rap a, ka duhthusam a thleng bawk," tiin a sawi.

France captain Yannick Noah chuan, "Kum 16 chhung hlawhtlinna kan chan theih loh hnuah player langsar leh hraw tak tak paltlanga nomawi kan chawi thei hi a ropui a, kan team chhunga player tinte hnathawh kha a ropui a ni," a ti ve bawk.