Monaco hnehtu PSG an fâl

Paris St-Germain chuan cham­pion lai AS Monaco chu 2-1 a luh­chhuahin French Ligue 1 match 14 khelh tawhah point kua zetin an sang fal ta.

Pathianni zan Stade Louis II-a inkhelah Edinson Cavani chuan hnai tak aṭangin Monaco goalkeeper Danijel Subasic dan hman loh turin a kheng lut zauh, Colombia international striker hian tun season chhungin inelna hrang hrangah goal 23 a khung der tawh, league bika a goal 13-na chiah a ni bawk. Khawveal player manto ber Neymar chuan ama penalty hlawhchhuah a chhuih lut bawk.

Champion lai Monaco hian Joao Moutinho-a free kick hmangin an si phurh an sut ṭhen. Kylian Mbappe chuan Moutinho ball pet hi a lo dang pial lut palh a ni. France rawlthar duhawm Mbappe-a'n loan hmanga a chhuahsan Monaco lakah hun ṭha a hmu nual a, mahse a hlawhtling lo vek.

Kum 18 mi Mbappe hian season hmasa khan Moanco hi league nomawi a chawipui a, Champions League semifinal a hruai thleng bawk. Nipui bazar lai khan sum ngah PSG chu loan hmangin a zawn a, season tharah khawvel palayer manto pahnihna ni turin Paris club hi a nghetin a zawm ang.

PSG manager Unai Emery chuan, "Champion lai kan hneh thei hi thil ṭha tak a ni, chak chhunzawm zel kan tum ang," a ti. Spanish ma­nager hian Mbappe chuan a ṭhiante tan hun ṭha a siamsak hnem avangin a khel ṭha thawkhat tih a sawi a, chutihrualin a hun ṭha neih ho kha khung ni sela chuan duhthusam a kim ang, tiin a sawi bawk.