Barcelona chelhtu Valencia an nghing lo

Valencia khelmualah Barcelona chu hnehna chang tura beisei ni mah se Catalan club phak loa table lama pahnihna dinhmun luah mektu Valencia an tlawm duh bik lo a, an mikhual hi 1-1 in an lo chelh.

Mualneitu team tan Rodrigo chuan minute 60-naah goal hmahruai a khung a, minute 80 a nih thleng pawha a chhanletna nei thei lo Barcelona an tlawm ngei dawn niin a lang hman - mah se minute 82-naah Barca tan Jordi Alba a inlar a, Valencia defender hlui hian a club hlui lamah goal mawi bik leh an si phurh sutna ni bawk a khung.

President, i tan

Valencia-in minute 60-naah goal hmahruai an khung a, goal khungtu hi Spanish striker Rodrigo a ni. Kum 26 mi striker hian a goal khung hi sam lem khum chungin a lawm a, lawm avanga he sam lem hi khum a ni satliah lo.

Karhmasa Zirtawpni khan Valencia president hlui Jaime Orti chu a thi a, Pathianni zan inkhelh hma pawh khan a sunna hun hman a ni. Orti hian Rafael Benitez hoa Spain an thunun lai, 2003-04 season-a a zawna season hnih nana league nomawi an chawi khan fan-ten an pek sam lem khum chungin an champion a lawm a, an President hlui hriatreng nan hian Orti hian a khum a ni.

Vanduai Barca

Valencia-in minute 60-naa goal hmahruai an khung hma hian Barcelona-in goal an khung tawh a, mah se referee-in he goal hi a pawm tlat lo. La Liga top scorer nilai Lionel Messi-a ball pet chuan chiang taka goal line a pelh hnuah Valencia keeper Neto chuan a hui chhuak a, penalty area pawn lama awm referee chuan goal-ah a pawm tlat lo.

Spanish football journalist lar Andy West chuan ball-in goal line a pel lai thlalak tarlang chungin, "Engtinnge mi hian video technology hman an duh loh zawk theih? Zanina tihsual pawi tak ang kha a pumpelh theih dawn asin," a ti a, La Liga-a video assistant referee (VAR) hman a ṭulna a sawi.

Valverde thukhawchang

Barcelona coach Ernesto Valverde chuan, "Game ṭha tak a ni a, league hmahruaitu kan la nih reng avangin kan lawm a ni. Huaisen takin kha game kha kan hmachhawn a, hnehna chan ngei duhin kan khel a ni," a ti.

Valverde chuan sawi chhunzawmin, "First half inkhel kha kan thunun em em a, kan goal khung pawmsak kan ni lo bawk. Chawlhlawk hman a nih hnuah erawh Valencia khan min nawr na a, mah se goal kan chhuah hnuah kan insiamṭha lehnghal. Kan goal khung pawm a ni lo khan kan game a ti buai a, assistant referee khan thutlukna dik lo a siam a ni," a ti a, a lungawi lo hle.