Mizoram Premier League Season 6 ; Mimal lawmman dawng thei tur a hriat ta
Mizoram chhunga football inelna sang ber Mizoram Premier League Season 6-a mimal lawmman dawng thei tur chu nimin khan MPL Board-in a puang. League round-a pakhatna Chhinga Vengin player paruk thawhin thawh hnem ber an ni.
I League club Aizawl FC-in player pali thawhin Chhingcows dawtah an awm a, Mizoram Police-in player pathum neiin Bethlehem Vengthlang, Chanmari FC leh Chanmari West FC ten player pahnih ṭheuh an thawh. Ramhlun North-in player pakhat neiin MPL aṭanga relegate Dinthar FC player aṭanga thlan an awm lo.
Best keeper thar!
MPL hmasa paliah Aizawl Venglai tlangval Lalawmpuia'n best goalkeeper chawimawina a dawng vek a, season liam taa best goalkeeper Malsawmdawngzela nen tun season nominee-ah an tel lo a, best keeper thar an awm dawn tihna a ni. Aizawl FC keeper AwP-a hian khelhna hmun a chang tam tawk lo a, Mala hian Dinthar FC a chet ṭhatpui lo.
MPL semifinal thleng phak zingah Mizoram Police an lang pha lo a, tun season-ah goal 38 zet an chhuah a, hei hi kumin MFA Super Cup best keeper Lalṭanpuia hming lan lohna chhanah a ngaih theih.
Aizawl FC keeper zinga inlan hnem ber Avilash Paul hming a lang a, Chhinga Veng keeper Zothanmawia leh Chanmari keeper Lalmuanawma te nen semifinal an la khelh vek dawn avangin an zinga pakhat hian best goalkeeper chawimawina an dawn a beiseiawm. Nominee-a lang dang Bethlehem Vengthlang keeper Lalruatpuia leh Chanmari West keeper Lalmalsawma te tan beiseina awm mah sea tam lo.
Bang rinawm
Chhinga Veng FC captain Lalrinchhana Tochhawng hi MFA Super Cup-ah best defender atan thlan a ni tawh a, ani hi tlarhnung tiphuitu mai ni loa team hui khawmtu a nih avangin MPL nominee-ah hi chuan a serh zinga a mei ang a ni; MPL4-ah khan best defender chawimawina hi a lo dawng tawh bawk.
Chhingcows tan right back R. Laldinliana'n season ṭha tak a hmang a, Armed Veng South tlangval hian goal hnih a khung bakah goal khungna turin tlarhma lam a pui ṭha a, a tlan chakna leh tharum ngahna chu club dang taha ṭih tham a tling.
Aizawl FC defender Masih Saighani-a'n round 8 aṭang chauhin MPL khel mah se khelmual chhunga a inlanin I League club-in hneh loh an tawng lo. Masih hian defender ni chungin goal li ngawt a khung tawh a, AFC-in semifinal an khelh theihna chhanah a ngaih theih.
Chanmari FC-in season an hmang ṭha tawk lo a, an player zinga tlo ber Thomas Lalengkima hming erawh a lang pha. Semifinal lut pha lo zinga mi Bethlehem Vengthlang defender PC Laldinpuia a tel bawk a, Samthang tlangval hi ṭum hnih man of the match-ah thlan a ni a, Mizoram kawr ha tlak a ni.
Game tidanglamtu
Aizawl FC midfielder David Lalrinmuana hi MPL3-ah best midfielder atan thlan a ni tawh a, vawi hnih dawng thei hmasa ber dinhmunah a ding. Zemabawk North tlangval hian season bul ṭan ṭha tawk lo mah se Lammualah a thiamna a pho chhuak leh tawh a, goal li a khung tawh.
Mizoram Police midfield tichaktu F. Zosangliana'n MPL a khelh hmasak ber season-ah nominee-ah a tel nghal.
Shillong Lajong aṭanga Chanmari West zawmtu Jacob Lalrawngbawla'n tun season-ah ball a pet thiamzia lantirin nominee-ah a tel bawk. Tlungvel tlangval Jacob-a hian goal nga a khung a, a freekick leh corner pet te chu West Warrior goal nawrna ber a ni.
Chhinga Veng midfielder R. Malsawmtluanga'n MFA Super Cup best midfielder chawimawina dawng tawh a, MPL-ah pawh hmun pawimawh a chang chhunzawm zel. MS-a hian goal thum a khung tawh a, man of the match-ah ṭum thum thlan a ni tawh bawk.
Chhingcows midfielder Lalrinchhana hming a lang bawk a, Electric Veng tlangval hi season liam ta khan best midfielder dawng pha lo langsar ber a ni a, tun season-a dawng tur chuan match hmabak a khelh ṭhat a ṭul hmel.
Goal khungtute
Mizoram Police-in tun season-a goal khung tam pahnih Lalfakzuala (10 Goals) leh F. Lalrinpuia (9 Goals) te an kawl a, an hming hmaih a thiang lo.
Chhinga Veng striker Malsawmfela'n round 7 hnu lamah goal la khung lo mah se defender tan buaina a la ni tho a, season tir lama khelh dan thlirin nominee-ah tel a phu a, hmabak a la neih bawk avangin Ramhlun South tlangval hming thai bo a la thiang lo.
Aizawl FC winger H. Lalmuankima chu forward zingah telh a ni a, Bawngkawn tlangval hi hrem vangin season tir lam inlan lo mah se a awm hnuah AFC chu team dang an ni. MK-a hian goal li a khung tawh a, man of the match-ah ṭum hnih thlan a ni tawh.
Ramhlun North winger Lalrinfela'n a team khelhna semifinal thlen pui lo nachungin goal nawr kawngah erawh a thawh hlawk hle. Khawlailung tlangval Rinfela hian goal khat chauh khung mah se ṭum thum man of the mach-ah thlan a ni a, hei hian a khelh ṭhat zia a sawifiah.
Mimal lawmman dawng thei turte
Best Goalkeeper
1 Avilash Paul Aizawl FC
2 Lalmalsawma Chanmari West
3 Lalmuanawma Chanmari FC
4 Lalruatpuia Bethlehem VT
5 Zothanmawia Chhinga Veng
Best Defender
1 Lalrinchhana Tochhawng Chhinga Veng
2 Masih Saighani Aizawl FC
3 PC Laldinpuia Bethlehem VT
4 R. Laldinliana Chhinga Veng
5 Thomas Lalengkima Chanmari FC
Best Midfielder
1 David Lalrinmuana Aizawl FC
2 F. Zosangliana Mizoram Police
3 Jacob Lalrawngbawla Chanmari West
4 Lalrinchhana Chhinga Veng
5 R. Malsawmtluanga Chhinga Veng
Best Forward
1 F. Lalrinpuia Mizoram Police
2 H. Lalmuankima Aizawl FC
3 Lalfakzuala Mizoram Police
4 Lalrinfela Ramhlun North
5 Malsawmfela Chhinga Veng
Note : Hming hi alphabetical order a dah a ni.
MPL Thlirletna
MPL Season 1
Champion Dinthar FC
Best Player R. Laldanmawia, Dinthar FC
Top Scorer MS Dawngliana, Chanmari FC (10 Goals)
Best Goalkeeper Lalawmpuia, Chanmari FC
Best Defender Zothanpuia, Chanmari FC
Best Midfielder Rohmingthanga, FC Kulikawn
Best Forward F. Lalrinpuia, Mizoram Police
MPL Season 2
Champion Chanmari FC
Best Player R. Malsawmtluanga, Chanmari FC
Top Scorer Lalbiakhlua, Mizoram Police (8 Goals)
Best Goalkeeper Lalawmpuia, Chanmari FC
Best Defender Zothanpuia, Chanmari FC
Best Midfielder Reuben Zosangpuia, Luangmual FC
Best Forward MS Dawngliana, Chanmari FC
MPL Season 3
Champion Aizawl FC
Best Player Lalramchullova, Aizawl FC
Top Scorer Lalbiakhlua, Mizoram Police FC (9 Goals)
Best Golkeeper Lalawmpuia, Chanmari FC
Best Defender Emmanuel Chigozie, Aizawl FC
Best Midfielder David Lalrinmuana, Aizawl FC
Best Forward Malsawmfela, Chanmari FC
MPL Season 4
Champion Aizawl FC
Best Player F. Lalrinpuia, Aizawl FC
Top Scorer F. Lalrinpuia, Aizawl FC (13 Goals)
Best Golkeeper Lalawmpuia, Zo United FC
Best Defender Lalrinchhana Tochhawng, Chanmari FC
Best Midfielder K. Lalṭhathanga, Bethlehem VT FC
Best Forward F. Lalrinpuia, Aizawl FC
MPL Season 5
Champion Chanmari FC
Best Player Malsawmfela, Chanmari FC
Top Scorer Laldampuia Tochhawng, Chanmari West (11 Goals)
Best Golkeeper Malsawmdawngzela, Bethlehem VT FC
Best Defender Lalhlimpuia, Bethlehem VT FC
Best Midfielder Lalruatfela Zote, Chanmari FC
Best Forward Malsawmfela, Chanmari FC