Vincenzo Montella thlaktu Gennaro Gattuso

AC Milan chuan an manager Vincenzo Montella an ban, a hmunruak hnawh khat turin an player hlui leh youth team enkawltu ni bawk Gennaro Gattuso an lalut nghal.

Italian manager Montella kaihhruaina hnuaiah Milan hian Serie A-ah point 20 hmuin pasarihna an ni mek a, hmahruaitu Napoli chu point 18 zetin an phak lo. Tun hnai an league hnuhnung pakuaah vawi hnih chiah hnehna an chang - kartawp khan Torino nen goal awm loin an inhnehtawk a ni.

AC Milan midfielder hlui Gattuso hian kum 1999 aṭanga 2013 chhung Milan tan a khel a, Serie A leh Champions League nomawi vawi hnih ve ve a chawi pui hman, inkhelh a chawlhsan hnuah youth team enkawl hna a thawk zui a, tunah chuan a club hlui a enkawl tawh dawn.

Europa League khelh puitu Montella chuan ban a nih hnuah Milan a enkawl thei chu a lawm thu sawiin, "Milan enkawl theihna hun ṭha ka nei ve kha ka lawm, ka tan chuan chawimawina a tling. Club thuneitu leh fans chungah ka lawm a, Gattuso hian ropui taka a hruai theih ka beisei a, duhsakna ka hlan bawk," tiin a sawi. Milan chuan Montella chu club tana ṭhahnemngai tak a nih vang leh a hna thawh avangin a chungah an lawm thu an sawi ve bawk.

AC Milan hi Italy chhungah chauh ni loin European club zingah pawh sulhnu nei ṭha leh ropui berte zinga mi an ni. Serie A nomawi vawi 18 an chawi tawh a, European title pawh pasarih an chawi tawh bawk.

Amaherawhchu, Milan hi tun hnaiah an tlahniam hle. Kum 2013 hnu lamah Serie A bikah an la champion lo mai pawh ni loin a sang pathum zingah pawh an tel phak tawh lo, tun season-ah erawh Europa League an khel phak hram.

Chinese sumdang hausa Li Yonghong-a'n nikum April thla khan neitu nihna a nei pumhlum a, nipui bazarah khan player thar 10 chuang lakluh nan pound maktaduai 205 chuang an hmang. Mahse, an sum hman hnem hian rahṭha a chhuah theih rih loh avangin an manager-in a tawrh phah ta a ni.