Sanchez leh Ozil An chhuak lo ang - Wenger

Arsenal manager Arsene Wenger chuan January thlaa transfer bazar a inhawn hunah forward Alexis Sanchez leh midfielder Mesut Ozil te an chhuah dawn loh thu a sawi chiang.

Chile international Sanchez leh Germany international Ozil ten Arsenal tan tun season daih bak contract an nei tawh lo a, contract thar an ziak a nih loh chuan a thlawnin an duh lam an pan thei dawn. Gunners tan an khel zui dawn lo a nih chuan North London club hian an player ṭha pahnih man aṭangin sum an la lut dawn lo tihna a ni.

Player pawimawh pahnih chungchang sawiin Wenger chuan, "Thil mak danglam bik a thleng a nih ngawt loh chuan season tawp thleng chu an cham ang, he thutlukna hi season ṭan dawn aṭang tawh a siam a ni. Hun rei zawk an la chham chhunzawm dawn em tih erawh tun dinhmuna sawi theih a la ni lo," tiin a sawi.

Sanchez leh Ozil te bakah hian Jack Wilshere hma hun a chiang lo bawk, French manager hian England international Wilshere hi player ṭha tak a nih avangin Emirates Stadium-a a cham chhunzawm theih nan a theihtawpa hma a lak tur thu a sawi bawk.