Hneh theih loh an awm lo - Pellegrino

Manchester City-in tun season Premier League-ah hneh loh an la tawng lo a, zanina an khingpui tur Southampton manager Mauricio Pellegrino chuan infiamna khawvelah hneh theih loh an awm loh thu a sawi. Zanin 1:30 hian Etihad Stadium-ah City leh Saints an inhmachhawn ang.

Southampton hian an match hnuhnung berah Everton 4-1 in an sawp a, hemi ṭum hian Charlie Austin, Dusan Tadic leh Ryan Bertrand te ṭum dang aiin an khel ṭha a. Kum 22 mi Pierre-Emile Hojbjerg chu midfield-a ha khel ṭha a, Danish midfielder hian tun season-ah a vawi khat nan minute 90 khel tling chauh mah se City nen pawh a inlan leh ngei a rinawm.

Argentine manager Pellegrino chuan, "Football a ni emaw infiamna dang pawh ni se hneh theih loh an awm lo. Team zawng zawngin chak lohna lai an nei vek a, Huddersfield pawh kha an hlawhtling ṭep chu a ni," tiin City chu hneh theih an nih thu a sawi.

Manchester City hian match 13 aṭangin point 37 an hlawh chhuak a, English football inelna sang bera match 13 khelh zawha point hmu tam ber record an siam. Pep Guardiola tana chanchin duhawm lo erawh John Stones leh Benjamin Mendy te chu inhliam vangin an inlan thei dawn lo a, yellow card pali hmu tling tawh Fernandinho leh Leroy Sane te chhawr theih an ni lo bawk ang.

Amaherawhchu, tlarhma lama awm Sergio Aguero leh Gabries Jesus te an dam ṭha a, Argentine leh Brazilian forward te chawmtu tur Kevin de Bruyne khelh ṭhat vanglai a nih bawk avangin Saints tan Eithad Stadium-a City record duhawm tak tihtawp a harsa ang.