Chelsea leh Arsenal inlan dawn

Premier League champion Chelsea tan nomawi humhim a harsa tawh dawn, chutih rualin manager Antonio Conte chuan tun hnaia Eden Hazard khelh

ṭhat avangin champion theih an la beisei thu a sawi. Arsenal goalkeeper Petr Cech pawhin an tan nomawi beiseina a la tawp loh thu a sawi ve bawk.

Blues hian zanin dar 1:15-ah Swansea City an mikhual ang a, Gunners hian kai thar Hud­dersfield chu Emirates Stadium-ah an lo mikhual bawk ang; London club pahnih inkarah hian point khat chiah a awm a, zanin hian chak an tum ve ve khawp ang.

Hazard awmna Blues

Kartawp inkhelah Chelsea hi Anfield-ah lenglutin Liverpool chu 1-1 in an inhnehtawk pui a, league hmahruaitu Manchester City an phak lohna chu point 11 zet a ni tawh. Italian manager Conte-a'n point an hloh avangin champion a harsa dawn tih a hai lo, chutih rualin Eden Hazard kutah an innghahna a len tawh thu a sawi.

Belgium international Hazard hi ram tana training a neihna hmunah a ke rek a hliam a, season bul a ṭan thei lo. A dam hnuah beisei a phak nghal mai bik lo, an match hnuhnung pahniha West Brom leh Reds an hmachhawn ṭumah erawh chuan midfield-ah a pawimawhin an game chawk nungtu a ni a, goal nawr kawnga an thahrui pawimawh a ni leh tawh bawk.

Blues manager Conte chuan, "Eden tel loin season bul kan ṭan a, kan tan leh a tan pawh season bul lam kha chu a harsa hle. Tunah chuan a dam tawh a, a ṭhat dan berin a khel chhuak mek a ni. Alvaro Morata nen an in man em em a, ka hmuh dan chuan tlarhmaah pawh a khel thei ang," tiin a sawi.

League match hnuhnung pangaah Chelsea hi an tlawm miah lo a, season hmasa ang bawkin Manchester City chu pawh thlak theih an la inbeisei hle. Chutihrualin Champions League an khelh tel tawh avang­in nikum lama an tih ang ngawt kha chuan an tan kawng a awlsam tawh bik lo ang.

Italian manager Conte chuan, "Manchester City hian nipui bazarah khan an player duh ber zel an la thei a, tunah chuan team ṭha tak an ni tawh. Chutih rualin season hmasa pawh khan team

ṭha an ni tawh a, chesual ve thei tho an la ni," a ti. Conte hian December-ah match khelh tur an ngah avangin January thlaah chuan an dinhmun a insawn dawrh theih thu a sawi tel bawk.

Cech-a beiseina

Chelsea tana Premier League nomawi vawi li chawi tawh Petr Cech-a'n Arsenal a zawm hnuah league-ah a la champion pui lo a, tun season-ah pawh rinkai ber an ni leh tawh lo - City aiin point 12 zetin an hniam tawh.

Gunners keeper Cech chuan, "Match 13 chiah kan la khel a, hmabak a la tam hle. A pawimawh ber chu match khelh a pianga hnehna chan zel a ni a, chu chuan kan chunga awmte a nawr chiai dawn a ni," tiin City lakah an la tlawm loh thu a sawi.

Arsenal hian hun tawp dawna Ale­xis Sanchez-a goal khung hmangin Burnley chu si khat faiin an hneh hram a, a sang pali zingah an tel leh tawh. Burnley lakah hian midfielder Mesut Ozil chu damlohna vangin an chhawr thei lo a, zaninah pawh an la chawr thei dawn lo.

Gunners manager Arsene Wenger chuan, "Eng tiang chiah­in nge a damloh ka hre lo, ka hnenah doctor a rawn kal a, a damlohna vanga haw a ngaih thu a rawn sawi, Huddersfield hmachhawn chu a tan a la hma deuh mai thei," tiin a sawi.

Germany international Ozil a awm loh vangin Alex Iwobi-a'n inkhel bul a ṭan a, Jack Wilshere chu minute 67-naah bench aṭanga luhtir a ni; England international Wilshere hian inkhel bul a ṭan a nih chuan tun season Premier League-a starting eleven-a a awm vawi khatna tur a ni.