Dec 2-ah Futsal coach tan inzirna Dec 11-ah Futsal tournament

Mizoram Football Association Futsal Com­mittee tun hnaia ṭhu khawm chuan futsal lama hmalakna tur chi hrang hrang an rel.

Trainer's Trai­ning

December 2, 2017 hian MFA hnuaia Futsal Team zawng zawng tan trainer's training Ramhlun Sports Complex-ah buat­saih a ni dawn. He hunah hian MFA Futsal League khel tur club 16-te bakah Division One lama inziak lut club zawng zawngin mi pahnih tirh tur a ni.

Trainer's training-ah hian AFC Level 1 Futsal Course zir chhuakten Futsal coach dangte trai­ning an pe dawn a, MFA hnuaia Futsal Club zawng zawngin coach pahnih (an remchan loh chuan aiawh pahnih) tirh tur a ni.

FIFA leh AFC dan anga futsal kalpui dan, coa­ching pek leh team enkawlna lama hriat tur bul ṭhut (basic) zirho a ni ang.

Division One

Tourna­ment

MFA Futsal hnuai­a Division One Club te tan December 11 aṭang­in Lammualah tour­na­ment khelh a ni dawn. November-a khelh tur tih chu khelmual remchan loh avangin December-ah sawn a ni.

Champion team-in Rs 10,000 dawngin pa­hnihnain Rs 5,000 an dawng ang a, semifinalist chinin Rs 2,000 an dawng ang.

January 2018-ah hian Division One tan tour­nament siam a ni leh bawk dawn a ni.

Futsal League

MFA chuan January 2018 aṭang­in Futsal League a buatsaih dawn. He League khel tur hian playoff zawh fel ni tawhin team 16 an tel thei ang. Television-ah live-a pekchhuah tur a ni dawn a, Futsal League kal­pui tur hian chak takin in­buatsaihna a kal mek a ni.

Transfer

December 1-15 chhung hian MFA Futsal Committee chuan transfer hun a hawng. He mi chhung hian player lut leh chhuakte zalen takin an duhnaah an kal thei dawn a; chutihlaiin Futsal club nei tawhte hmun danga an insawn dawn chuan an khelhna hmasa aṭanga ziaka chhuah phal­na lak hmasak a ngai ang.

Transfer hian MFA Futsal League club-te bakah Division One club-te a huam vek dawn a, player luh leh chhuah danah bithliah a awm lo ang.