MPL6 Under 18-ah goal 128 a lut

Mizoram Premier League Season 6 Under 18 inelna chu November 25, Inrinni zan khan Lammualah a ṭiak a, Chhinga Veng FC-in nomawi an chawi. Chhingcows hian champion turin inelnaa goal lut zat goal 128 aṭangin goal 30 an khung.

Champion tawhte

MPL kum bithliah inelna hi Under 17-a ṭan ni a, Chanmari FC U17-in kum hnih a zawnin an champion nghal. Hemi ṭuma champion puitu Jerry Mawihmingthanga chu Indian Super League club Jamshedpur FC tan khel tawh.

MPL Under 18 hming a put hnuah Mizoram Police Under 18-in a zawnin vawi hnih nomawi an chawi ve leh a, MPL5-ah Bethlehem Vengthlang an champion ve bawk. Dinthar FC leh Chanmari FC tana khel tawh Lalengmawia (Apuia) chu India aiawha FIFA World Cup Under 17 khel zingah a telpha a, MPL kum bithliah inelna hian player a chher chhuak ṭha hle.

Kumin inelnaa Chhinga Veng an champion a, player beiseiawm ṭhahnem tak an kawl a, eng an thlen ang tih erawh hunin a hril ang. MPL Under 18 khelh tawh aṭanga thlirin champion team a mi kher an ṭha zui lo tih a lang a, nakin lawka Mizo player ṭha chhuak leh tur erawh MPL kum bithliah inelna neih zawh takah khan an inlan nei a rinawm thung.

Vanneih a ṭul

Chhinga Vengin MPL U18 nomawi chawi turin semifinal-ah champion lai Bethlehem Vengthlang chu 4-1 in an sawp a, final-ah hetiang zat bawk hian vawi nga final lut thei Dinthar FC an sawp leh bawk. Knockout aṭanga thlir chuan Chhingcows hian awlsam takin nomawi an chawiah a ngaih theih a, amaherawhchu semifinal thleng tur hian an vannei hle.

Chhingcows hian league round-ah point 12 an hmu a, match hnuhnung bera Mizoram Police leh Aizawl FC inkhel result-ah an hmalam hun a awm. Police-in semifinal lut tawh chungin rilru dik tak pu chungin AFC an hmachhawn a, 3-1 a hnehna an chan avang chauhin Chhinga Vengin semifinal an lut. Aizawl FC hi chak tak zawk se chuan knockout stage china goal riat khung thei team Chhingcows hi semifinal-ah hmuh an ni lo ang a, mimal lawmman dawngtu thlengin a danglam ang.

Fak phu coaching staff

Chhinga Veng player-te khelmual chhungah an che ṭha a, hemi phenah hian coaching staff-ten hna ṭha tak an thawk. Coach James Dawngliana leh manager F. Lalrinsiama (Tetea) ten fak an phu a ni.

Chhingcows manager Tetea chuan, "League round-a kan result aṭang chuan nomawi kan chawi theih ka beisei lo. Mahse beisei phak baka ṭhain knockout stage kan khel a, kan thawhhona ṭhat zar a ni. Champion tumin kan thawkrim a, kan inringtawk bawk a ni. Final-ah ṭhianpa Lallawmkima (Tea) enkawl Dinthar FC kan hneh a, vannei ka inti hle," tiin Vanglaini a hrilh.

MPL Under 18 Final
Chhinga Veng 4 - 1 Dinthar FC
CVFC : Hmingthansanga 25' (OG); C. Beithalo 36;
R. Savatna Jeevan Ratna 38'; F. Lalnuntluanga 82'
DFC : Vanlalzairimawia 7'
Fair play : Chhinga Veng
Mimal Lawmmam
Best Goalkeeper : RS Lawmzuala, Dinthar FC
Best Defender : Laltlankima, Bethlehem VT
Best Midfielder : Alan Lallawmsiama, Chhinga Veng
Best Forward : F. Lalnuntluanga, Chhinga Veng
Best Player : C. Beithalo, Chhinga Veng
Goal thum aia tam khungte
Hming Club Goal
F. Lalnuntluanga Chhinga Veng 8
Lalruatkima Bethlehem VT 6
Lalruatdika Ramhlun North 6
C. Beithatlo Chhinga Veng 5
Vanlalrinpuia Mizoram Police 5
Michael Laltanpuia Bethlehem VT 4
R. Lalchhantluanga Bethlehem VT 4
Lalnunzama Chanmari FC 4
S. Beirahropha Chhinga Veng 4
Lalhmingmuanpuia Chhinga Veng 4
Lalmalsawmtluanga Dinthar FC 4
Laldinpuia Pachuau Ramhlun North 4