Shillong Lajong-in hnehna nen bul an ṭan
I League match hmasa berah Shillong Lajong-in point thum an hlawh chhuak nghal a, I League club thar Gokulam FC chu 1-0 in an hneh. Meghalaya club goal neihchhun hi Alen Deory khung a ni a, Mizo tlangval Samuel Lalmuanpuia siamsak a ni.
Rawlthar rual awmkhawmna Lajong-ah Mizo player pathum awm mah se captain Samuel Lalmuanpuia chu inkhel bul ṭantu awmchhun a ni a, F. Lalrohlua leh Lalrammuana te tan hmun a la awm rih lo.
Mizo captain
Shillong Lajong-in Mizo player an lo chhawr ṭangkai tawh ṭhin a, tuna Ramhlun North coach Samson Ramengmawia chu club captain a lo ni tawh. Thawhṭanni zana an I League season ṭan hmain Lajong hian tun season-a an club captain tur hming an puang a, a hming chu Samuel Lalmuanpuia a ni.
Zemabawk North tlangval hian season hnih chhung I League-ah Shillong Lajong tan a lo khel tawh a, 2015-16 season-ah phei kha chuan Aizawl FC laka 3-1 a hnehna an channa inkhelah goal khungin I League chanchina goal khung thei naupang ber dinhmun a lo chelh tawh.
Samuel-a hoin
Puan lawk a nih ang ngeiin Mizo tlangval Samuel-a'n Lajong tan captain armband a rawn hreng a, hetihrual hian an coach kumhlun Thangboi Singto-a'n technical director ni tura Kerala Blasters lam a pan avanga youth coach
aṭanga senior team enkawl tura hlankai Bobby Nongbet chuan chhungkaw thil avangin Lajong hi an match hmasa berah a kaihruai thei lo.
Meghalaya club hi 4-2-3-1 formation hmangin an inrem a, tlarhnungah Kynsailang Khongsit, Equatorial Guinea international Laurence Doe, South Korean defender Juho Oh leh Rakesh Pradhan an inkawp. Midfield laiah Nigerian defender Daniel Odafin leh Yemen international Ayman Al-Hagri inkawpin Redeem Tlang leh Hardy Cliff chu mualvei lam sirah dah an ni a, tlarhmaa mal tlat Samuel-a thlawp turin Alen Deory dah a ni.
Tute nge Gokulam?
Tun season I League khel turin Gokulam FC an inlei tling a, Kerala club tan India ram football inelna sang bera an hmel inlan vawi khatna a ni. Gokulam hian an mikhualna ramah 4-3-3 formation an hmang a, tlarhnungah Daniel Addo, Aizawl FC leh Chhinga Veng defender hlui Emmanuel Chigozie, Kerala Blasters defender hlui Sushanth Mathew leh Provat Lakra an dah.
Midfield laiah Syrian club ṭha Al-Ittihad midfielder hlui Khaled Al Saleh hoin Mohamed Irshad leh Mohammad Rashid te ho an inrem a, tlarhmaah season hmasaa Aizawl FC striker Bayi Kamo, Pune FC youth system chhuak Arif Shaikh leh Congo international Lelo Mbele te ho an inkawp a, inkhel hmuhnawm beisei ngam a ni.
Inkhel chu
Rawlthar rual Shillong Lajong-in inkhel ṭantir lam aṭangin Gokulam an nawr nghal a, an mualah tlawm an tum lo. Mahse, chance hlauhawm nei hmasa zawk erawh Gokulam an ni a, Kerala club tana Emma ball tauh chu Lajong-in goal line aṭangin an tauh chhuak hman. Lajong tan Redeem Tlang-a'n goalkeeper chauh a hmachhawn hnuah a pet goal thei lo a, goal dang awm loin chawlhlawk hman a ni.
Chawlhlawk hman a nih hnuah pawh Lajong aiin Gokulam an hlauhawm chhunzawm a, tlarhmaah Saudi Arabian club ṭha Al-Hilal FC striker hlui Lelo Mbele chu buaipui tham a ni. Mahse, minute 79-naah Lajong lam zawkin goal an khung ta nge nge a, Samuel Lalmuanpuia freekick pet ṭha zet chu Deory tan tauh goal harsa a ni lo - hun tawp thlengin goal dang a lut tawh lo a, Lajong an chak.
Zaninah Arrows
Vawinah I League inkhel pakhat a awm dawn a, tlai dar 5:30-ah Indian Arrows chuan Chennai City an mikhual dawn. Indian Arrows hi AIFF enkawlna hnuaia awm an ni a, Indian FA hian FIFA U17 World Cup khelh zawh taka player beiseiawm leh AIFF Elite Academy-a awm sa player te a dah khawm a,
I League an khel dawn.
Indian Arrows hi FIFA U17-a India coach Luis Matos enkawlna hnuaiah an khel dawn a, squad la puanzar ni lo mah se Mizo rawlthar Edmund Lalrindika leh Lalengmawia chu squad-ah hian an awm niin Vanglaini chuan thu a dawng. Striker Lalawmpuia erawh FC Goa lamin chhuah an phal loh avangin AIFF team-ah a khel thei lo a, Edmund-a hi Bengaluru lamin loan-in season khat chhung atan an chhuah-tir thung.