Russian athlete an hrem belh zel

Russian infiammi pangate chu an dam chhunga Olympic huanga tel ve thei tawh lo tura hrem an ni. International Olympic Committee chuan Russia chungchang zirchiangtu McLaren tarlan chu thudik nia ngaiin Sergei Chudinov, Aleksei Negodailo, Dmitry Trunenkov, Yana Romanova leh Olga Vilukhina te chungah hremna hi a lekkawh ta a ni.

Tun hnaiah damdawi hman phal loh hman chungchangah Russia an hmingchhe hle, nikum khan hemi chungchang zir bing tura tih McLaren chuan a zirchianna report tarlangin sorkar hriatpuina ngeiin infiammi 1,000 chuang zet chuan dan an bawhchhia tih hriatchhuah a ni a, Rio Olympic-ah khan an ram aiawh hian athlete tumah an inlan thei lo tawh bawk.

IOC chuan nakkum February thlaa neih tur Winter Olympics-ah Russian infiammite chu an awmdan tur an la sawi chiang thei rih lo a, December 5 hian an thutlukna an puang chiang hman tura ngaih a ni. Tun ṭuma mi panga an hrem belhte nen hian nikum November thla hnuah infiammi 19 zet chu damchhung atan hrem an ni tawh.