Zaninah Maha Derby khel dawn

Indian Super League-a Maharashtra Derby chu zanin dar 8:00 hian khelh a ni dawn a, Mumbai City chuan Pune City an mikhual dawn. Club pahnih hi vawi hnih inkhelha vawi khat ve ve hnehna chang tawh an ni a, zanina hnehna chan hi an tan a pawimawh dawn.

Mumbai City-ah Lalchhawnkima awm mah se Champhai tlangval hi ISL-ah a la inlan lo a, Pune City tan Lalchhuanmawia Fanai chu player pawimawh a ni thung - match hmasa bera inkhel bul a ṭan loh hnuah Isaac Vanmalsawma pawhin 4-1 ngawta Atletico de Kolkata an sawp ṭumin a hmel a lan tawh a, zaninah pawh hmun pawimawh chang leh tura beisei a ni.

Pune City tan ATK laka goal hnih khungtu Marcelinho bawk player pawimawh a ni leh dawn a, Brazilian forward hi season hmasaa Delhi Dynamos tan match 15 a khelha goal 10 khungtu kha niin tun season-ah pawh a hmuhnawm leh ṭan tawh.

Pune City tlarhnung lamah Chhuantea ten hna an ngah dawn bawk - Mumbai hian tlarhmaah Flamengo

aṭanga an hawh attacking midfielder Thiago Santos leh Paris Saint Germain striker hlui Everton Santos an nei a, Everton hi an match hnuhnung bera FC Goa tlarhnung chhaih mangangtu kha a nih miah avangin Pune lamin ven uluk a ṭul ang.