Ecuador coach thar Jordi Cruyff

Ecuador chuan Jordi Cruyff chu coach atan an la thar a, Johan Cryuff-a fapa hian kum thum daih contract a ziak. 

Barcelona leh Manchester United player hlui Jordi hian Ecuador hmain Maccabi Tel Aviv leh Chinese Super League club Chongqing Dangdai Lifante a enkawl tawh. Ecuador-in Jordi hnuaia an match hmasa ber tur chu Argentina nen a ni a, March 26 hian World Cup qualifier-ah an inhmachhawn dawn.

Kum 45 mi Jordi chuan, "Chona thar ka hmachhawn tur hian minti phur hle. Ecuador-in football hmanga an theihna an lanchhuahtir theih nan theihtawp ka chhuah dawn. Inelna pawimawh World Cup qualifier leh Copa America te kan hmaah a awm tih hi ka hrechiang," tiin a sawi. Ecuador hi 2018 World Cup khel turin an tling zo lo a, nikum khan Copa America first round-ah an tla bawk.