Aizawl FC khing tawk FC Venghnuai

Honda MPL9 semifinal first leg-ah Aizawl FC leh FC Venghnuai te 3-3 in an inhnehtawk. RG Stadium-ah mipui thawm a ṭha a, goal a lut tam a, inkhel a hmuhnawm bawk. Thawhlehni zan inkhel result avang hian November 25, Zirtawpni zan inkhel second leg a hmuhnawm sawt dawn.

MPL9 semifinal-ah away goal rule a awm lo a, first leg-in nghawng a nei tawh lo - second leg-a che ṭha zawkin final an lut dawn. First leg-ah Venghnuaiin ṭantu an nei ṭha a, an thawm pawh a ṭha, second leg-ah an tam lehzual dawn. Aizawl FC pawhin ṭantu an nei ṭha a, khelmual chhung leh pawnah an intluk tawk hle.

Goal ruk chu
Venghnuaiin minute 16-na lekah Lalruatfela hmangin goal an khung a, Ruatfela hian hla tak aṭangin keeper Hriatpuia a pet khum. Venghnuai defender hian goal khung tumin a pet nge cross a tum tih hriatthiam a har a, goal mawi tak zawng a ni.

I League club ben harhin an awm, minute 26-naah captain K. Lalhmangaihkima corner pet chu David Lalhlansanga'n a tauh hnuah Lalmuanawma'n (Munez) a tauh goal. Munez hian Khawzawla Chhinga Veng an hmachhawn ṭumin 'comeback'-na goal pawimawh a khung tawh bawk.

AFC an phur zel a, minute thum hnuah dinglam aṭanga Joseph Vanlalhruaia cross chu MS Dawngliana'n a tauh goal. Bawngkawn forward Dawngtea hian offside trap a bum (?) a, Venghnuai keeper Joel B. Lalramchhana'n cross ball a chhut sual bawk.

First half injury time-ah Dawngtea'n Venghnuai defender Lalnunsiama bumin rang zetin goal-ah a pet a, keeper Ramchhana'n a man pial avangin K. Lalrosanga'n goal ruakah a khung. Rosanga hi NE Olympic-a Mizoram tana goal medal latute zinga mi kha a ni.

Aizawl FC-in chiang takin hnehna an chang turah a ngaih theih a, mah se coach Lalrindika Hmar-in halftime a hmang ṭha. Second half Venghnuai dang daih an rawn inlan a, an goal bawh a na sawt. Minute 58-naah Venghnuai defender C Ramdinmawia'n mual dinglam aṭangin mawi zetin a pet lut a, 2-3 a nih tak avangin Venghnuai ṭantute an phur hle.

Ball kangah I League club keeper Hriata a talbuai a, Standly Rosario-a'n minute 64-naah Lalhruaitluanga a luhtir. Substitute keeper Hruaia hian inrintawkna a nei bik lo a, pressure sangah a hlauthawng tih hai rual a ni lo.

Minute 73-naah keeper Hruaia a chesual a, AFC defender Munez-a'n Venghnuai forward Malsawmzuala Tlangte veng vek mah se AFC keeper hi a rawn chhuak. Sawma Tlangte hian vei lam box pawn aṭangin goal-ah petin keeper awm lohna goal ruakah a sawt lut. Goal dang a luh belh tawh lo, 3-3 in an inhnehtawk.

A hautak
Aizawl FC-in I League match neih zawhah MPL an khel leh nghal a, Sudeva Delhi an hneh ṭuma Mizo player bul ṭantu captain Lalchhawnkima, K. Lalmalsawma, K. Lalrinfela, R. Lalthanmawia, R. Ramdinthara leh Lalramsanga te hahdamtir an ni.

Mizo club hi an squad a chhah avangin inkhel chik lo phei chuan chhawr ngun player paruk an khel lo tih an hre lo hial ang. Chutihrualin I League-a bul ṭantu player paruk pawh hi rawn let se, danglamna a tam lo thei bawk.

Mizo goalkeeper ten hmasawn an mamawh tih a lang a, Standly Rosario-a'n I League match thuma Mizo keeper aia Maharashtra keeper Vikram Lahkbir Singh a thlan chhan chu semifinal thawh khatnaah hian hmuhin a awm.

Venghnuai erawh MPL-ah insawrbing mah se an squad a chhah ve lo a, I League club-a jersey chang pha lo zingah bul ṭan tura awh tak tak an nei ngei ang. Mahse, Venghnuai hian anmahni thlawptu 'veng mipui' an nei a, champion an beisei ngam bawk.

Semifinal
FIRST LEG
November 22, Thawhlehni
Aizawl FC 3 - 3 FC Venghnuai
AFC : Lalmuanawma (Munez) 26', MS Dawngliana 29', K. Lalrosanga 45+3'
FCV : Lalruatfela 16'; C Ramdinmawia 58'; Malsawmzuala Tlangte 73'
MoM: MS Dawngliana, Aizawl FC

Player inlan
AFC: Vanlalhriatpuia (Lalhruaitluanga 64'); Rohmingthanga, Lalmuanawma (Munez), Ramngaihsanga, Zodingliana; David Lalhlansanga, Joseph Vanlalhruaia (Lalchhanhima Sailo (82'), K. Lalhmangaihkima (C), Lalthankima (Augustine Lalrochana 64'); MS Dawngliana, K. Lalrosanga (Jeremy Laldinpuia 46')
FCV: Joel B. Lalramchhana; C. Ngurnuntluanga (C. Ramnunpuia 19'), Lalnunsiama, Lalruatfela, C. Ramdinmawia, H. Lalrempuia; Lalruatfela (RF-a), Peter Lalrinhlua (Lalbiakzuala Chawngthu 65'), Thangzawmsanga (Eric Remruatpuia 65'); Vanlalthanga, Malsawmzuala Tlangte

Nizan Inkhel (Result kan hre hman lo)
Chhinga Veng 7:00 PM Chawnpui FC

SECOND LEG
November 25, Zirtawpni
FC Venghnuai 7:00 PM Aizawl FC

November 26, Inrinni
Chawnpui FC 7:00 PM Chhinga Veng FC

Awlsam taka chak thei tur kan ni a, 3-1 a nih hnu khan goal li khung theihna pawh kan nei. Goal li kha chu khung ila, nuam sa takin second leg kan khel thei ang. Mahse, kan keeper-te chetsual ṭum kan tawng a, kan vanduai ve bawk. Tunah chuan 50-50 a ni leh tawh a, second leg-ah chuan player kimin kan khel tawh ang. - Standly Rosarizo, Aizawl FC coach


3-1 khan chak lo ngat ila, beisei a tlem tawh khawp ang. Ka nauten beiseina an nei tlat a, hun a tawp meuh chuan 3-3 a ni thei hial. Kan result-ah kan lawm a, final luh beiseina sang tak kan neih theih phah. Second leg-ah Venghnuai mipui puihna nen hnehna chan ngei kan tum. - Lalrindika Hmar, Venghnuai FC coach