Croatia leh Morocco inhnehtawk

Nimin tlai World Cup group F inkhelah Croatia leh Morocco te chu 0-0 in an inhnehtawk. Goal luh lohna inkhelah Morocco chu point khat hmuh vanga lawm zawk an ni ang, tun World Cup khelh laia goal luh lohna inkhel pathumna a ni.

Nizan zanlai khan Belgium leh Canada ten group F match dang an khel a, result kan hre hman lo.

Al Bayt Stadium-a inkhelah team pahnih an fimkhur, goal hlauhawm pawh kan hmu har. Croatian forward Nikola Vlasic-a'n hnai tak aṭangin goal lamah pet mah se, keeper Yassine Bounou-a'n awmna tur hmun a thlang dik a, a lo dansak hram.

Chawlhlawk hma hretin box chhung aṭanga ball rawn per chhuak chu, ram tana World Cup khel thei upa ber Luka Modric (kum 37 leh ni 75 mi) hmaah a kal, Real Madrid midfielder hian a kaw laia dah keuh aiin na taka hlap a thlang zawk a, goal bar chungah a her liam.

Second half-ah ram pahnihin goal khung an tum nasa, player nei ṭha zawk Croatia lamin remchang pawh an insiam zauh zauh, mahse Achraf Hakimi awmna Morocco an chesual duh bik lo - Sevilla si ban nghaktu Bounou a rintlak a, goal an chhuah duh tlat lo.

Morocco tan Hakim Ziyech a hlauhawm leh zauh ṭhin. Chelsea forward hi ram tana inkhelh chawlhsan tawh, chumi hnua kir leh a ni. Mual sir lama an hmanraw hlauhawm ni mah se, amah vengtu Borna Sosa-a'n a hnaihchilh zel a, a dang tluan thei.

November 27, Pathianni zanah ram pahnih an inlan leh dawn. Croatia hian dar 9:30-ah Canada an tum leh dawn, dar 6:30-ah Morocco leh Belgium te an inhmachhawn thung ang.