Pep-a tan contract thar

Manchester City manager Pep Guardiola chuan kum hnih daih contract a ziak thar. Spanish manager hian kum 2025 thleng Etihad Stadium-ah hna a thawk chhunzawm dawn tihna a ni.

Guardiola hian Citizens hi kum ruk chhung a enkawl tawh, hetih chhung hian Premier League nomawi pali bakah nomawi dang pasarih a chawi tawh, a title lak belhkhawm hi 11 zet a nih avangin hna a thawk ṭha tih a chiang.

Kum 51 mi Pep hian Man City hi match 374 a kaihruai tawh a, Citizens enkawl rei ber record a siam der tawh a, a record neih lai hi a sawhnghet zual zel dawn tihna a ni.

Barcelona leh Bayern Munich pawh enkawl tawhtu Guardiola chuan, "Manchester City ka pan tirh ni aṭanga khan eng emaw danglam riau hi a awm, ka tan chuan helai aia hmun ṭha hi a awm thei tawh chuang lo ang.

"Season hnih atana kan inrem thei hi ka lawm a, he club hi a ṭha thei anga bera enkawl chungin, a sang thei ang ber thlen pui ka tum dawn a ni," tiin a sawi a, tun hma zawng aia hna thawh ṭhat a tum.

Man City hi Premier League champion lai an ni, tun season kal laiah erawh Arsenal hnuaiah an awm mek.