A tikimtu nih tum lo Cameroon

Cameroon assistant coach Sebastien Migne chuan Qatar-ah chuan khualzin satliah anga kal an nih loh thu sawiin, "Kan ṭhat dan berin khelh kan tum ang," a ti.

Indomitable Lions (Cameroon sawina) hian vawiin tlai dar 3:30-ah Switzerland an hmachhawn dawn a, Cameroonian Football Federation president Samuel Eto'o -a'n an ram team an champion a rin thu sawi mah se, a awlsam dawn lo.

Migne chuan, "Kan champion thei ang em, ka hre lo a, mahse, Qatar-ah hian khualzin anga kal kan ni lo. Cameroon ṭha ber pholang turin kan kal a ni," tiin a sawi a, an inpeih tawh hle.

Cameroon tan André-Frank Zambo Anguissa chu innghahna a ni dawn a, tun season-a Napoli tana match 24-a goal thum leh assist vawi sarih nei thei midfielder hi Switzerland tan ven uluk a ṭul ang.

Lyon forward Karl Toko Ekambi leh Bayern Munich tana tun season-a match 16 a khelha goal 11 khungtu Eric Maxim Choupo-Moting te chu Cameroon tana danglamna thlen thei an ni bawk.

Mahse, Switzerland hi awlsam taka hneh tur chi an ni bik lo - qualifier-ah pawh Italy leh Northern Ireland te nen an awm ho chungin, match riat an khelhah point 18 hmuin an tlawm miah lo a, group hmahruaitu ni chungin Qatar pan turin an tling.

Hei chauh a ni lo - Switzerland hian Nations League-a an match hnuhnung pathumah Portugal, Spain leh Czech Republic te a zawna hnehin, League A an cham chhunzawm a, team ṭha an ni tih an pholang.

Switzerland tan captain Granit Xhaka, tawnhriat nei ṭha Xherdan Shaqiri, AS Monaco tana season duhawm tak hmangtu Breel Embolo, Manchester City centre back Manuel Akanji leh Newcastle United defender Fabian Schar te chet ṭhat chu Cameroon laka result ṭha neih nan a pawimawh ang - an group-ah Brazil an awm ve, tih an theihnghilh loh a ṭha!