Uruguay & Portugal inlan zan a thleng - a hmuhnawm dawn

World Cup 2022-a group ngaihnawm ber pawl ni tura rin thlang dawn ila, group H kan thlang furin a rinawm - Uruguay, South Korea, Portugal leh Ghana awmna group an ni tlat a, a hmuhnawmin, a ngaihnawm lo thei lo.

Uruguay hi zanind dar 6:30-ah South Korea nen an intawng dawn a, Asian football powerhouse hian captain Son Heung-min an neih avangin ngaihven an hlawh hle - zanin erawh hliam vangin a inlan thei lo mai thei.

Tun hnaia khelmual chhung aia pawn lama chanchin ngah zawk Cristiano Ronaldo telna Portugal pawh zanin dar 9:30-ah an inlan dawn a, an hmachhawn tur hi Ghana a nih avangin a awlsam dawn lo.

Ronaldo-a'n tun hnaiah interview neiin a club khelhna Manchester United na takin a bei a, a contract tihtawp zui a ni. Portuguese forward hian a chunga thil thlengin an team a tihbuai loh thu a sawi a, a thusawi dik leh dik loh kan hre thuai dawn e!

Thim ata êngah
Uruguay-in qualifier-ah result an neih ṭhat loh avangin, kum 15 zet an coach lo ni tawh Óscar Tabárez chu a hna aṭangin an chawlhtir a, a hmun ruakah hian Uruguay international hlui Diego Alonso an lalut.

Tabarez hnuaiah Uruguay hian Brazil chu 4-1 ngawtin an ngam lo a, khualmualah Bolivia chu 3-0 in an ngam lo bawk. Mahse, Alonso luh hnuah an danglam zui a, qualifier match li khelh hmabak an neihah an chak vek!

Match kua chiah Uruguay la kaihruaitu Alonso hian player a la siksawi fo a, an ṭhat dan ber a la hre fuh lo ti pawhin a sawi theih. Mahse, he team hian squad an neih chhah avangin an ngaihtuahawm lo.

Tlarhmaah Luis Suárez, Darin Nunez leh Edinson Cavani te an la awm vung a, midfield-ah Real Madrid player Federico Valverde leh Tottenham Hotspur player Rodrigo Bentancur te ho an la awm a, an ṭha tawk.

South Korea beiseina
Jungkook-a te ṭhian ho vang ringawt pawha Mizo nula tam takin an ṭan South Korea-in Son an nei a, an chhuanvawr a ni. Mahse, World Cup ṭan hmaa a hliam avangin a inlan dawn leh dawn loh a la chiang lo.

South Korea coach Paulo Bento chuan, "Ni tinin kan endik a ngai," a ti a, Son hi chuan inkhel tura 'risk' lak a huam thu a sawi - a inlan loh ngat chuan Uruguay tan thawk huaina tham a ni dawn.

Mahse, Taegeuk Warriors (South Korea sawina) hian Wolverhampton Wanderers forward Hwang Hee-chan, Real Mallorca attacking midfielder ṭhangduang Lee Kang-in leh SC Freiburg winger Jeong Woo-yeong te ho an nei tih hriat a ṭha.

Tlarhnungah Napoli centre back ṭha mi Kim Min-jae hoin South Korea an ding dawn a, Suarez leh a ṭhiante tan awlsam taka paltlang tur chu an ni bik lo ang.

Hei le Portugal
Portugal-in Ronaldo an nei a, hei ringawt pawh thlamuanpui tham a ni - Diogo Jota inhliam mah se Atletico Madrid forward João Félix leh AC Milan forward ṭhangduang Rafael Leão te ho an nei a, Ghana su hawng tur khawpin an ṭha tawk.

Mahse, Ghana hian tlarhnungah Brighton & Hove Albion defender Tariq Lamptey, Leicester City player Daniel Amartey leh Southampton centre back Mohammed Salisu te ho an awm a, duh duh huna paltlang tur chu an ni bik lo!

United nena inṭhen hlim Ronaldo hian player ṭha bik a ni tih pholan duhin goal khung a châk leh dawn tih a chiang a, ram tan match 191-a goal 117 khungtu hi kum 37 ni tawh mah se a la rintlak reng.

Manchester City player ṭha bik Bernardo Silva pawh hi Ghana tan buaipui tham a la tling dawn tih a chiang a, United chhuanvawr Bruno Fernandes theihnghilh a thiang lo ang.

Hmabak hautak
Black Stars (Ghana sawina) hian World Cup ṭum thum an lo hmachhawn tawh - kum 2014 kha group stage an paltlang loh awmchhun a ni a, kum 2018-ah an inpetkai zo lo zui.

AFCON khelh zawh takah pawh khan Ghana hian group stage an paltlang zo lo. Mahse, coach Milovan Rajevac banin Otto Addo an lalut a, Addo hnuaiah hmasawnin, World Cup hial an inpetkai.

Ghana hian tlarhmaah goal nawr turin Crystal Palace forward Jordan Ayew, kum 18 mi Abdul Fatawu Issahaku leh Athletic Bilbao forward Iñaki Williams te an nei a, Portugal laka point thum beisei turin an ṭha tawk.

Midfield-ah Arsenal midfielder Thomas Partey chu innghahna tling a ni a, kum 32 mi winger André Ayew pawh Al-Sadd lamah khel tawh mah se player ṭha tak a la ni reng - mahse, Portugal hian tlarhnungah Pepe, Rúben Dias, João Cancelo leh Borussia Dortmund defender Raphael Guerreiro te ho an tlar thei dawn a, a awlsam lo ang.