Naupang League nu leh pate leh hruaitute inkawm

Reliance Foundation Young Champs leh Mizoram Football Association buatsaih Naupang League-a tel team thenkhata nu leh pate chu November 22, Thawhlehni zan khan Vaivakawn YMA Auditorium-ah an inkawm.

RFYC hotupa Yash Patel chuan Mizorama Naupang League an kalpui chhan, an beisei leh kal zel an tum dante an sawifiah a, nu leh pate hnenah lawmthu an sawi rualin he League hlawhtlinna tura tawhho ṭhat a ṭul thu te, season tawp thlenga chawl loa kal a ṭul tur thute an sawi.

MFA aiawha thusawitu honorary secretary Lalnghinglova Hmar chuan, "Nu leh pate tel loin he project hi a hlawhtling thei lo a, a tawp thlenga kan ṭan tlan chuan Naupang League aṭang hian professional footballer leh India aiawha khel tur player an chhuak ngei ang tih ka ring tlat a ni," a ti a, MFA-in nu leh pate chu ṭang mar pât tura a beisei thu a sawi.

Nu leh paten zawhna an zawh bakah an ngaihdante an sawi a, RFYC leh MFA chungah lawmthute sawiin an tu leh fate tana an thil buaipui chu ṭha an tih thute an sawi rualin rawtnate an nei bawk.

RFYC-a Head of Youth Sandro Salami chuan football an zirtir dan, an khelhtir dan tur leh an hmathlir a sawifiah bawk.

He hunah hian Chawnpui Veng, Dawrpui Vengthar, Dinthar, Hunthar, Kanan Veng, Tanhril (Becks Academy) leh Zotlang team aiawhte an tel.