Lewandowski-a penalty dangtu Ochoa

Khawvela striker ṭha bik sawi chuan Robert Lewandowski hming lam hmaih a thiang lo. Mahse, Poland captain hian World Cup bikah goal a la khung miah lo, remchang ṭha bik nei mah se Mexico goalkeeper Guillermo Ochoa a paltlang thei tlat lo a ni.

Thawhlehni zan group C inkhelah Poland leh Mexico te hi 0-0 in an inhnehtawk. Minute 58-naah Poland lamin penalty an hmu a, a pet turin Lewy a rawn ding chhuak - Barcelona striker hian goal pawimawh a khung ngei a rinawm.

Mahse, a hmaah tawnhriat nei ṭha tak Ochoa a ding miah a, kum 37 mi Ochoa hian ball a lo zuan dik chat. Poland keeper Wojciech Szczesny-a'n Hirving Lozano leh Jorge Sanchez te khung tur a dansak ve thung a, point an insem ta a ni.

Mexico coach Gerardo Martino-a'n hun tawp dawn lamah Raul Jimenez a dah lut thei tawh. Wolves striker hi hliam damkawr a ni a, an match lehpeka Argentina an hmachhawn hunah chuan bul ṭan turin a inpeih tawh ang.