O Hexa - A vawi ruk nana champion beisei Brazil
Brazil-ah chuan football hi an nuna bet tlat a ni a, politician-te pawhin hlawhtlin nana football pawimawhzia hriain politics nen an chawhpawlh nasa ṭhin hle - Brazil mipui tan chuan football hi 'nunna' a ni.
Chutiang taka football tuipuitu Brazil chu zanin dar 12:30 hian an match hmasa ber khel turin an inlan dawn a, Serbia nen an intawng dawn - a vawi ruk 'O Hexa' nana champion beisei team hi chak thei tak ang maw? tiin mipui an inzawt mek.
World Cup-a vawi nga champion tawh Brazil hi champion ngun ber an ni a, mahse, 2002 hnuah an champion leh tawh lo mai a ni lo a, final pawh an khel lo - thawnthu ngaihnawm ziak leh turin an insangmar e!
Vawiin tlai dar 3:30 hian group G inkhel dangah Switzerland leh Cameroon an inhmachhawn dawn bawk a, team intiat tawk tak an nih avangin inkhel hmuhnawm a beisei ngam ang.
Buaina duhawm
World Cup-a Brazil coach buaina pakhat chu duhthlanga a buai hi a ni - tlarhma ringawt pawh en ila, Neymar hoin Vinícius Júnior, Rodrygo, Raphinha, Gabriel Jesus, Antony leh Richarlison te ho an intlar thei a, he team hi an chhe lo.
Tite-a'n 4-1-4-1 formation a rawn hmangin a rinawm a, chuti a nih chuan tlarhmaah Richarlison awmin, Raphinha leh Vinicius ten mual sirah an thlawp ang a, Neymar chuan 'free role' chelhin a duh anga tal tura zalenna a nei ang.
Brazil hian Liverpool chhuanvawr Alisson leh Manchester City keeper Ederson an nei a, mahse, Tite-a'n a lo chhawr tawh ṭhin dan leh international-a keeper pahnih tawnhriat thlirin, Alisson chu si ban nghak tura ngaih a ni.
Tlarhnung laiah tawnhriat nei ṭha Thiago Silva leh Marquinhos an inkawp thei ang a, Danilo leh Alex Sandro ten full back hna chelhin, Casemiro-a'n tlarhnung venpui hna a thawk ang a, midfield-ah Lucas Paqueta a awm ang.
Brazil an ṭha
South America-ah an awm chungin, Brazil hian World Cup khel turin harsatna an tawk lo. Match 17 an khelhah vawi 14 an chak a, vawi thum an khingpui an inhnehtawkpui a, tlawm an nei miah lo!
Brazil hian match 17-ah hian goal 40 zet an khung a, an lamah goal nga chiah a lut - goal khung an thiam a, tlarhnung ven an thiam tel bawk tihna a ni a, Serbia tan a awlsam dawn lo.
Chutihrual chuan Serbia hian goal khung turin Juventus striker ṭha Dusan Vlahovic leh Fiorentina striker Luka Jovic an nei a, Fulham striker Aleksandar Mitrovic chu hliam vangin a inlan rinawm lo mah se Brazil tlarhnung tan inthlahdah a thiang dawn chuang lo tih a lang.
Sevilla midfielder ṭha Nemanja Gudelj leh European club liante chil tiputtu Sergej Milinkovic-Savic te chu midfield-ah inkawp thei tura beisei an ni a, Brazil tan hna a awlsam bik hauh lo ang.