Champion lai France an che na

World Cup champion lai France chuan Thawhlehni zan khan an group match hmasa ber an khel ve ṭan a, goal chhuah hmasa zet mah se an vaw let nasa hle - Didier Deschamps enkawl team hian Australia chu 4-1 in an sawp.

Les Bleus tan Olivier Giroud-a'n goal hnih a khung a, an ram tana goal khung hnem ber Thierry Henry (51 Goals) a nihrual chiah, tun World Cup chhung ngeiin ram tana goal khung hnem record thar siam theihna remchang a nei dawn.

Group D inkhel dangah Denmark leh Tunisia te 0-0 in an inhnehtawk a, point khat ve ve an insem. France hi tlang chiang tura ngaih an ni a, hmunruak dang pathum chu ram pathum hian an inchuh ang.

Goal li a lut
Al Janoub Stadium-a inkhelah rin loh tak maiin Australia lam an che fuh hmasa zawk, minute kuana lekah Craig Goodwin chuan Mathew Leckie-a cross a khung, goal luh ruala zawhna awm nghal chu France tlarhnung an ṭha tawk lo em ni tih a ni.

Hliam vangin Presnel Kimpembe a khel thei lo a, tawnhriat nei ṭha Raphael Varane chu hliam dam hlim a nih avangin bench lamah dah a la ngai. Bayern Munich defender Dayot Upamecano leh Liverpool defender Ibrahima Konate te awmna laiah a tlang.

Socceroos lawm chhung erawh a rei thei lo. Chawlhlawk hmain Adrien Rabiot-a'n a sut bakah Olivier Giroud tan a siamsak bawk a. half time an hman meuh chuan chak zawk tur a chiang leh der tawh.

Kylian Mbappe-a'n goal thumna a tauh lut zui a, Paris Saint Germain forward hian striker ṭha Giroud-a tauh luh tur a siamsak ve leh bawk. Chak lo thei dinhmuna ding hman kha nuamsa takin an chak leh ta daih zawk.

Rin tlak Giroud
Paul Pogba leh N'Golo Kante te inkhel thei lo turin sawi a hlawh a, mahse tournament an khelh dawn meuh chuan a boruak a dai hman. Qatar pan vek tawh, inkhel ngei tura ngaih Karim Benzema a inhliam leh chiah kha chuan France ṭantute an nghilh dup.

Boruak rit angreng taka an awm laiin Deschamps a zam lo, a striker ṭha aiawh tur hi a ko miah lo! Hei erawh hriat tel a ngai, France hian an champion hnuhnunga an hmatawng ṭha pathum Giroud, Mbappe leh Antoine Griezmann te an la nei vek.

AC Milan striker Giroud hi media lama lang tam leh thawm nei lian a ni hran lo, mahse mamawh hunah tak a lo awm thei zel. Rabiot-a ball pek khung turin awmhmun a thlang fuh a, a goal hnihna a khung chhan pawh a awmhmun a dik bakah a lu a hman thiam vang a ni.

Giroud hi kum 36 mi a ni tawh a, a vanglai a pel tawh. Amaherawhchu, tuna France team indin sa leh khelh dan phungah chuan, tlarhma laia ding turin ani aia ṭha an awm bik kher lo ang, qualifying khelh laia an rin ngam loh kha tunah chuan innghahna a ni leh tawh.

Deschamps a lungawi
France coach Didier Deschamps chuan, "Olivier Giroud khan a tih tur dik tak a ni a, kan mamawh leh duh dan takin a khel chhuak," tiin a sawi a, a striker hi minute 89-naah a thlak, a thlak chhan chu hahchawlh tir zeuh a mamawh vang niin a sawi bawk.

A naute khelh dana a lungawi thu sawi zuiin Deschamps chuan, "Ka naute an khel ṭha vek, tun ṭum match bikah chuan a hmatawng lamin fak an phu. Mbappe hi chu khawvela ṭha berte zinga mi a ni tawh sa, Antoine Griezmann fin zia kan hmu.

"Adrien hian France tan a theihna a lantir tawh ṭhin, a theihnaah hian rinhlelh tur ka nei ngai lo. Mimal player ṭha a ni satliah lo a, team tana mi ṭangkai bik a ni," tiin a player-te a fak hle. An chesual viau a nih ngawt loh chuan group hmahruaitu an nih a rinawm.

Australia head coach Graham Arnold chuan an chak loh a pawm tih sawiin, "A bul kha kan ṭan ṭha hle, mahse world champion an nihna a rawn lang. Tharum kan ngaha, kan che rangin kan tlan chak zawkin ka hmu, mahse keini aiin football an thiam," a ti.

Giroud leh Ngaihnawm
• France youth team tan a inlan ve ngai miah lo.
• France senior team tan hian kum 25 a nihin an ko ve chauh.
• Arsenal a zawm khan kum 25 mi a ni tawh, Gunners kha European club lian a zawm hmasak ber a ni.
• Euro 2020 khan France tan minute 40 chauh a khel.
• World Cup 2018-ah France a champion pui.
• France tana goal khung hnem ber Thierry Henry (51 Goals) a nih rual.
• World Cup 2022 a khel mek, goal khung belh theihna remchang a nei.