Denmark leh Tunisia inhnehtawk

World Cup champion tum ngam zinga mi Denmark chuan an match hmasa berah goal an khung lo, an hneh tura ngaih Tunisia nen 0-0 in an inhnehtawk, last 16 lut tur chuan an hna a hautak chho tawh dawn tihna a ni.

Premier League player pawimawh chhawr nual thei mah se Denmark an che hleithei bik lo a, an goal khung pawm a nih loh bakah penalty an hmuh tur anga ngaih pek an ni lo, an vanduai ṭum tia sawi theih a ni ve bawk.

Denmark chauh an ni bik lo, Tunisia lam pawh an goal khung chu offside vanga hnawlsak an ni ve tho. Denmark hian hnai taka Andreas Cornelius khung loh an ui ang a, defender Andreas Christensen-a tauh luh loh pawh an ui rei viauin a rinawm.

Christian Eriksen awmna team hian Euro 2022-ah khan semifinal an thleng, team nghet tak an dinsa an ti nghet zual zel. World Cup qualifying match 10 an khelh zinga pakuaah an chak thei, inrintawkna an nei sang hle.

Mahse, Manchester United midfielder Eriksen leh a ṭhiante tlarhma lamah an hriam tawk, manager Kasper Hjulmund-a naute hian Inrinni zanah France an tum leh dawn, goal khung dan a ngaihtuah chhuah hman a ngai ang.

Denmark coach Hjulmund chuan, "Kan khelh dan thlir chuan result hi a lawmawm loh, result a lawmawm loh kan tih rual hial goal khat chauh pawh khung ni ila chuan khel ṭha tak tia sawi kan ni leh thei ve tho, danglamna siam kan tum ang," tiin a sawi.