Odisha khelmualah Chennaiyin leng dawn

Ni thum zet Indian Super League inkhel a awm tawh loh hnuah, zanin dar 7:30 hian ISL khelh ṭan a ni leh tawh dawn a, Odisha FC chuan Chennaiyin FC an mikhual dawn.

Odisha hian season an hmang pangngai hle - league match ruk khelh tawhah vawi li an chak a, vawi hnih chiah an la tlawm a, semifinal khelh beiseina an la neih chhunzawm zel.

Match hnuhnung berah phei chuan Odisha hian 4-2 in East Bengal an hneh a, Jerry Mawihmingthanga'n goal a khung. Chanmari tlangval hian tun season ISL-ah match ruk khelin goal hnih a khung tawh.

Mizo pariat awmna Odisha-ah hian Jerry bakah Isaac Vanmalsawma, Isak Vanlalruatfela leh Paul Ramfangzauva ten khelhna hmun an chang ṭhin bawk a, zaninah pawh Mizo player-te an inlan leh ngei a rinawm.

Odisha leh Chennaiyin inkhela chak zawk zawk hi top four huangah an invawrh lut dawn a, hei hian zanin inkhel boruak a ti 'hot' lo thei lo - Chennaiyin hian season dang ang lo takin Mizo player kawl an nei lo.

South Indian club hian Mumbai City chu 6-2 zeta an ngam loh hnuah, 3-1 in Jamshedpur FC an hneh leh tawh a, inrintawkna sang tak nen Chennaiyin khelmual an lut ang.