Ronaldo leh Piers Morgan inkawmna langsar zual
TalkTV-a tihchhuah turin Piers Morgan chuan Manchester United legend Cristiano Ronaldo chu a kawm a, an inkawmna hi November 16, 2022 khan a ti chhuak. Ronaldo hian thu thup nei loin manager Erik Ten Hag leh club chungchang a ṭha lo zawng a sawi a, tuna a contract an tihtawp chhan pawh hi a ni.
1. Man United a zawm leh chhan bakah hmelma Man City zawm tura thuthang chungchang
Ronaldo: Dik taka sawi chuan ka zawm teuh khawp mai. Mahse, Manchester United-ah sulhnu ka neih ṭhat ang bawkin club-ah hian ka thinlung a awm. Hei bakah hian Sir Alex Ferguson a inrawlh bawk.
Mak ka ti a, chutihrualin rilru fim takin thutlukna ka siam. Ka thinlung khan Man United zawm kha a duh a ni.
2. Club hlui zawmna kawnga Sir Alex-a hnathawh
Ronaldo: A pawimawh takzet a, danglamna rawn siamtu a ni. Duh chu ni ila, rinawm lo thei dinhmunah ka ding. Manchester City nen khan inhnaih lo chu ka ti thei lo. Rilru fim takin thutlukna ka siam a, inchhirna pawh ka nei lo.
Sir Alex Fergson nen kan inbia a, ani chuan, "Man City chu i zawm thei lo ang," min ti a, kei chuan ka pawm thlap a, thutlukna dikah ka ngai bawk.
3. Kum tam tak hnua awm bo hnua club hmuh dan
Ronaldo: Piers, dik taka sawi chuan Man United tana ka inziahluh leh khan kum 13 ka thang bo avangin engkim a danglam tawh ka ring. Mahse, engkim kha a ngai angin a la awm, a ngaia awm dan erawh a ṭha lo zawngin a ni. Hmasawnna a awm lo.
4. Transfer leh club facility chungchang
Ronaldo: Sir Alex a chhuah khan hmun ruak zau tak a awm a, amah chauh kha a ni lo. Chief executive David Gill pawh kha danglamna thlentu a ni a, pa ṭha tak a ni. Sir Alex hnuaia kalphung kha a ṭha em em bawk.
Mahse, ka rin aia zauin an hmunruak hi hnawh khah lohin a awm. Kum 10 chhunga thil thlen dan hi mak ka ti. United hmasawnna chu 'Zero' a ni. Real Madrid emaw Juventus emaw khawvel hmun dang nena khaikhinin training dan te, ei leh in bakah hmanraw chi hrang hrang awm dan chuan min barakhaih hle.
Tunah tak chuan club dang nena khaikhin chuan an hnufual. Hetianga club lian chuan a ṭha ber a nei tur a ni a, an nei si lo. Nakkum lamah te chuan an insiamṭhat theih ka beisei. Sir Alex Ferguson-a chhuahsan hnu khan hma an sawn tawh lo.
5. Ralf Rangnick chungchang
Ronaldo: Min enkawltu manager a nih miau avangin 'boss' tihin ka ko a, amaherawhchu ka rilru chhung rilah chuan 'boss' ah ka ngai lo a, ka pawm thei lo bawk.
Zidane, Ancelloti, Mourinho, Fernando Santos, Allegri leh coach dang ṭhahnem tak ka hrawn tawh a, anmahni aṭangin thil tam tak pawh kan zir.
Chutihrualin, coach thar neih hian thil thar an duh a, kan thurawn an pawm laiin ṭhenkhat chuan an pawm kher lo. Rangnick khan a tihtur a hre lo a, club chu hrechiang mah se club theihna tak tak leh sulhnu a hre lo. Chuvangin Ole Soksjaer an ban chuan Sports Director ni loin manager ṭha an la tur a ni.
6. Man Untied-a sawiselna tawh chungchang
Ronaldo: Kum 37 mi ka ni tawh a, thil tam tak ka zir chhuak tawh. Chet ṭhat lai te, chet chhiat lai te a awm a, tun hmaa kan hriat loh thil ṭhahnem tak kan hriat belh.
Hun duhawm loh neih hi pawi ka ti lo a, kan lam ṭang zingah kan ṭhat lohna duhtu awm zat hriat nan a pawimawh. Midang aiin a sawisel uar a, midang hlawhtlinna hmuh an harsat.
Tun hnaiah chuan ka chanchin a ṭha lo lam hlirin an sawi. Thla 4-5 liam taah phei kha chuan min sawiselna a nasa lehzual a, kei chuah ni loin ka chhungte thlengin an sawisel. A chang chuan hriatthiam harsa ka ti ṭhin.
Kei chuan min er vangah ka ngai a, ka hlawhtlin zel hi an hmu thei lo a ni. Kum 21 mi ka nih khan khawvela a ṭha ber zingah ka tel pha tawh a, khami tura ka paltlang pawh ka hria. Chet chhiat lai phei chuan sawiselna hi hriatthiam a har lehzual.
7. Sum nge hlawhtlinna?
Ronaldo: Record duhna hian min ti chak a ni. Mahse, dik taka sawi chuan season liam ta aṭang hkan football hi sum dawnna zawkah ka ngai. Inkhela chak duhna zawng zawng chu ka la nei vek a, mahse ka thlir dan a dang tawh. Khawvel pum hi han thlir ila, sumdawnna vek a ni.
8. Pre Season-a chhuah chungchang
Ronaldo: Kei leh player pariat kan chhuak a, ka hming chauh an sawi. Midang pawhin an ti ṭhin tho. Khami inkhel bikah chuan player dang pariat pawh an chhuak a, mahse ka chungchang chauh an sawi. Coach bulah ngaihdam ka dil a, khami chungchang kha chu a fel.
9. Tottenham nena luh duh loh chungchang
Ronaldo: Piers, i bulah chuan thu dik sawi ta ila. Stadium ka chhuahsan avang khan ka inchhir em tih min zawt se, inchhirna ka neih leh neih loh pawh hi ka hre thiam lo. 100% chu a sawi theih loh a, mahse ka inchhir lo ti ta ila, chutiang bawk chuan coach kha ka ti el ve bawk a ni.
Minute thum lek khel tur player ka ni lo. Team tana ka tih theih ka hrechiang a, khatiang huna lut tur ka ni lo.
10. United-in an hnawl dan leh Ten Hag nena an inkungkaihna
Ronaldo: Pre season ka khelh loh avangin nghah ka ṭul thu min hrilh a, ka hrethiam. Point petu chu ni lo mah ila, player zawng zawng inang khata en tur a ni lo. Hemi chungchangah hian point ka pe lo ang.
Pahnihnaah chuan Man United result kha a chhiat em avangin inṭhuahfai an mamawh a, mahse hma a lak dan erawh a dik lo. Media an hmachhawn dan a dik loh avangin an ziak nasa lehzual. Pre season-a ka tel loh avangin bul ka ṭan lo a, mahse a hnu lamah pawh min chhawr tam lo. Ka phu ang zahna ka dawng lo. Thil nih dan a nih miau avangin Tottenham lakah pawh stadium ka chhuahsan a ni.
10. Man City nena awltir chungchang
Ronaldo: Chhuanlam an siam char char. Kei aiin player dang ṭha zawka an ngai a nih chuan ka hrethiam a, mahse chhuanlam an siam zel. Man City nen khan min zah vangin min luhtir lo niin a sawi a, Tottenham lakah khan minute thum chauh khelhtir min tum si. A thusawi a inkalh a ni.
Tum reng vanga tiah ka ngai. National team emaw club dangah emaw hun tawp dawn lamah player inhliam vang leh mamawh vang chuan ka lut em em ang. Mahse kha inkhelah chauh ni loin a hma pawhin min lo tithinur tawh a ni.
11. Hremna chungchang
Ronaldo: Manchester United-in ka chunga hremna an lekkawh kha ka thinrim takzet. Dik taka sawi chuan club leh coach nen buaina kan nei lo. Mahse, ni thum ngawt min hrem a, na ka ti takzet a, zahthlak ka ti bawk.
Ka la hriat reng chu inah ka haw a, ka fapain, "Pa, i inkhel dawn lo a mi?," min ti. Kei chuan ni thum chhung min hrem thu ka hrilh a, ani chuan nui chungin, "Khawvela player ṭha ber engtin nge an hrem theih che," min ti.
Kei chuan, "Ni lo e. Ka khelh loh chhan tur chu ka nungchang vang zawk a ni," tiin ka hrilh a, mak a ti hle.
Thlirna dangah chuan chawlhna hun ṭha a ni a, mahse pawi ka ti tel bawk. Ka inchhir a, ka inthiam lo a, ka famkim buk lo. Tihsual ka nei a, mahse min hrem na mah mah a ni. Ka hrehawmna belhchhah turin media hmaah an puangzar a, min ti hrehawm takzet.
12. United leh Ten Hag chungchang
Ronaldo: Player ṭha ber, hlawhtlinna zawng zawng duhtu player hi minute thum chauh a khel ang maw. Teuh lo mai, a pawm theih loh. A hma zawngin min zah thu sawi reng chung siin thutlukna mak tak a siam duh a ni. Stadium ka chhuahsan hma avangin ka player-te chungah chuan ngaihdam ka dil a, mahse min zah lotu coach lakah erawh ngaihdam ka dil lo ang.
Hemi avang hian kan inkar boruak a ṭha lo a, media hmaah chuan thu ṭha tak tak a sawi mai. Khatiang kha chu media tan chuah chauh a ni. Min zah lotu chu ka zah dawn lo.
13. Saudi aṭanga sawmna duhawm
Ronaldo: Season hnih atana pound maktaduai 350 hlawh tura sawmna hi thudik a ni a, mahse media hoin an sawi chu tumahin min duh lo tih hi a ni. Hei hi a dik lo. Ka awmnaah hian ka lawm a, season ṭha tak hmang turin ka inpeih. Mahse tumahin Cristiano an duh lo an ti reng a, enga tinge nikum maia goal 32 khungtu player hi an duh loh teh lul ang.
14. Messi nena an inlaichinna chungchang
Ronaldo: Player danglam bik a ni. Kum 16 chhung chu kan inel tawh a, kum 16 chu rei tak a ni. Kan inkar boruak hi a ṭha. Mahse phone-a inbe pawp reng ang zawnga kan teh chuan ṭhian kan ni lo a, chutihrualin inkhelhpui ṭhin ang zawng chuan ṭhian kan ni.
Messi nupui leh ka nupui (bialnu) te pawh hi an inzah tawn em em a, kan nu pawh hi Argentine a ni. Messi chungchang sawi dawn chuan mi ṭha tak football thiam tak tiin ka sawi ang.
15. Chawlh chungchang
Ronaldo: Kum hnih emaw kum thum emaw chu inkhelh ka la duh. Kum 40 ka nih chuan inkhelh chawlhsan ka duh a, kum 40 hi chawlh hun atana kum ṭha niin ka hria. Football khelh zawh hnua ka hmalam zel erawh ka sawi thei lo.