MPL6 final lut hriat zan Chanmari vs Chhinga Veng

Chhinga Veng leh Chanmari mipuiin zaninah Mizoram Premier League Season 6 final an luh leh luh loh an hre dawn.

Zanin dar 7:30 hian Lammualah semi final first leg-a 1-1 a inhnehtawk tawh team pahnih an intawng leh dawn. Minute 90 chhunga chak zawk an awm lo nawn a nih chuan penalty shootout hmangin final khel tur zawnna neih a ni tawh ang.

Thlir let ila
Kumin MFA Super Cup-ah Chhinga Veng FC-in nomawi an chawi laiin Chanmari FC chu first round-ah an tla.

I Day Football-ah group stage-ah intawng ṭanin Lalsangzuala Hmar kaihhruai Chhingcows-in 5-1 in hnehna an chang a; Chanmarians-in final thleng tho mah se 1-2 in Chhingcows lakah an tlawm nawn.

MPL-ah club pahnihin bul an ṭan ṭha ve ve a, amah­erawh­chu Chanmari FC-in ṭum hnih tawp Chhinga Veng an hneh loh avangin an talbuai a, semifinal kalkawng a harsat phah hle.

Tun season-a an record chu 4-0 a nih miau avangin Chhinga Veng tan semifinal-a Chanmari hmachhawn hi pawhfuh ang mai a ni.

Amaherawhchu, Chhinga Veng beisei angin semifinal a awlsam lo a, first half-ah Chanmari FC-in an ngam zawk. Hriangtlang tlangval Vanlalbiaa Chhangte-in chance ṭha ṭum thum hlah mah se penalty a hlawh chhuak tho a, MC Malsawmzuala'n a khung.

Chhinga Veng player-te'n first leg-ah goal an khung thei lo a, Chanmari midfielder Joseph Lalfakzuala'n an lama tauhluh zarah an si phurh an sut hram a, 1-1 inkhel a tawp.

Eng nge thleng ta?
Chhinga Veng coach Sanga chuan, "First half kan khel ṭha lo i ti maw? i hre sual a nih chu - kan khel ṭha lutuk. Kan ball khawihte pawh kan duh ang thlap a ni. Mahse referee khan thutlukna dik lo tak a siam," tiin inkhelh banah Zonet zawhna a chhang a, an chak zawh loh chhanah referee mawhpuh mah se - first half-a chance ngah zawk chu Chanmari an ni.

Chhingcows boss Sanga hian a club hlui Chanmari FC nen an in­hnehtawk chu pawi a tih thu a sawi bakah goal li goal nga khung thei an nih thu a sawi bawk.

MPL vawi hnih champion tawh Chanmari FC tan chuan an coach hlui thusawi hi pawm a har dawn a, Lammualah Chanmari mipui an tam phah sawt ang. Chhinga Veng mipui pawhin an veng club tana a theihna zawng zawng hlantu Sanga an ṭawimawh a ṭul bawk ang.

Hetihlai hian Chanmari coach H. Vanlalthlanga chuan, "MPL-ah chuan chak chiang sa awm tur chuan kan la inthlau lo. Keini aia an ṭha zawk a nih pawhin ka player-ten concentration an hloh loh chuan chak thei tur kan ni," tiin a thawh dunpui ṭhin Sanga thusawi a pawm loh thu a sawi thung.

Final thlen inbeisei
Chhinga Veng hian foreigner pahnih defen­der Lasisi Adeyemi Wahab leh mid­fielder Olumide Olawale-te bakah Khasi midfielder Joy Mrong Kharraswai te an kawl a, amaherawhchu coach Sanga'n Mizo player chungah rinna a nghat zawk.

Chhingcows hian MPL mimal lawm­man dawng tur paruk an thawh thei a, heng Mizo player ṭha paruk keeper Zothanmawia, defender Lalrinchhana Tochhawng leh Laldinliana, midfielder R. Mal­sawmtluanga leh Lalrinchhana bakah striker Malsawmfela te hian inkhel bul an ṭan vek a rinawm.

Heng bakah hian season liam ta top scorer Laldampuia leh goal khung kawnga MPL-a hming chher tawh MS Dawngliana, Lalrammuanpuia, Lalkhawpuimawia leh Lalding­ngheta te an kawl a, Chhinga Veng hi an ṭha - final lut lo zawka an ṭang a nih chuan rilru na tur zawk an ni ang.

Mahse...
Chhinga Veng tan hlauh­thawn­awm erawh vanduai thei an ni. Malsawmfela'n round 7 hnuah goal a khung tawh lo a, semifinal-ah pawh chance ṭhahnem tak a hlah.

Hei bakah hian rinkai zawk an nih avangin pressure ngah tur zawk an ni a, Chanmari FC-in defensive game an khel a nih chuan an hmabak a harsa leh sawt bawk ang.

Engpawh chu nise Sanga thawh­rim sengin Chhingcows hian attacking game mawi an khel ṭhin a, goal an mamawh avangin minute 90 chhung inkhel hmuhnawm an pho chhuak dawn tihna a ni a, neutral supporter tan Lammual panna chhan a tling ang.

Chanmari hi...
Chanmari mipuiin an zia tak tak an la chhuah tawk lo. Lammualah 'Shabash' tih thawm a la ring tawk lo a, tun season-ah 'Chanmari veng kan ni e, entawn tlak kan awm lo' tih phei chu la ri meuh lo!

Tun season-ah Chanmari FC-in MPL mimal lawmman dawng thei tur pahnih chiah an thawh. Keeper F. Lalmuanawma leh an khingpui keeper Zothanmawia te best keeper nominee-ah an langsar a, zanin hi keeper ṭha zawk zawnna turah a ngaih theih ang.

Defender C. Lalrosanga chu nominee-ah telh a ni lo a, Lunglei tlangval hi a theihna sang mah se tun season-ah hun pawimawhah tihsual a ngah. Zaninah Rosanga tan chetsual a thiang lo a, Mizo de­fender ṭha zinga telh a nih zel theih nan a fimkhur thel a ṭul dawn.

Chanmari tan goal venhim a pawimawh rualin an bet reng chuan an buai dawn a, hei vang tak hian tlarhma lama awm Vanlalbiaa, Ṭhasiama, Jakob Lal­rawng­bawla leh Lal­muanzova ten khelhna hun pek an nih chuan an chakna hmanga Chhinga Veng tlar­hnung an tihbuai theih a ṭul bawk ang.

Chanmari coach Thlanga chuan, "Theihtawp kan chhuah dawn a, danglamna thlen theitu tur chu mipui an ni. First leg-ah khan min ṭantute zarah tun season-a kan ngam loh Chhinga Veng kan bei tawk a, entu ṭha zawk nen chuan kan hneh thei ang,," tiin mipui a sawm.