Watford ngam loh Ashley Young

Ashley Young-a goal hnih hmangin Manchester United chan Watford chu 4-2 in an va luhchhuah a, manager Jose Mourinho chuan Vicarage Road-a hnehna an chang thei chuan phurna a siamsak thu a sawi chhuak.

Thawhlehni zan Premier League inkhelah United tan Young-a'n a club hlui laka a khung bakah Anthony Martial leh Jesse Lingard ten goal an khung a, mualneitu lam hian Troy Deeney leh Abdoulaye Doucoure te hmangin goal an khung ve bawk.

Red Devils hian khual­mualah champion lai Chelsea leh kai thar Huddersfield te an ngam lo tawh a, season hmasa lama an chetsual tawhna hmunah United-in goal hnih chhuah mah se a khung tam zawk an nih miau avangin point thum an hmu.

Manchester United ma­nager Mourinho chuan, "Minute 90 chhung hlauhawm takin kan khel thei a, kan vanneih ṭum chu ni se goal sarih khung thei tur kan ni. Si thum faiin hnehna chang pawh ni ila a pawi lo, mah se Watford hi team ṭha tak an nih avangin min nawr buai ve hle a ni," tiin a sawi.

United hian league match 14 khelhah point 32 an hmu tawh a, an chungah hian hneh loh la tawng lo Manchester City chiah an awm, an inthlauhna chu point nga a ni - nizan khan City hian Southampton an hmachhawn a, Pep Guardiola naute hian hnehna an chang a nih chuan an inkar a zau leh sawt ang.

Everton aṭanga lakluh striker Romelu Lukaku-a'n goal a khung loh chhunzawm a, bench aṭanga luhtir Zlatan Ibrahimovic pawhin goal a la pai rih lo. Belgium international Lukaku hian United tana a match hmasa 10 aṭangin goal 11 khung thei mah se tun hnai a match hnuhnung 11-ah goal khat bak a khung thei lo.

Mourinho chuan, "Hun ṭha a neih a hlah, goal a khung loh vangin ka sawisel ngawt lo, a chhan chu team tana player ṭangkai tak a ni. Player puitling leh ṭha tak a ni a, hlimna nasa zawk min la siamsak leh ngei ang tih ka ring," tiin a sawi.

Manchester United hian Inrinni zanah Arsenal chu Emi­rates Stadium-ah an len­chilh dawn a, Watford pawhin Tottenham an mikhual chhun­zawm dawn bawk a ni.