Sub Junior Inter District Champion inchuh tur Aizawl vs Kolasib

Mizorama rawlthar rual inelna 13th Sub Junior Inter District Football Championship final chu vawiin chawhnu dar 1:00 hian khelh a ni dawn a, Aizawl leh Kolasib-in Mizorama kum 14 hnuailam football thiam ber nih an inchuh dawn.

Champhai Chhangphut Field-a inkhel tur team pahnih hi tun inelnaa team hmuhnawm ber pahnih an nih avangin inkhel hmuhnawm a beisei ngam a, Zonet Rihnim chuan en theih turin live-in a pe chhuak dawn a ni.

Team pahnih hi group stage-ah an lo intawng tawh a, Kolasib lam hian 3-0 ngawtin hnehna an chang. Vawiinah Kolasib-in an hnehna chan kha an tihfuh vang a ni lo tih lantir an tum ang a, Aizawl lamin phuba lakna duhawmah chantir an tum thung ang.

Kolasib hian goal khung an thiam tluk zetin goal ven pawh an thiam. Final thleng tura match li an khelhah hnehna an chang fai vek - goal 17 khungin goal khat chiah an chhuah a, Aizawl tan hriat nuam a ni lo.

Hetihrual hian Kolasib hian group stage-a an hneh hnu an nih avanga Aizawl hi an dah hniam ngawt a nih chuan an tisual ang - an match hmasa bera Kolasib an ngam loh hnuah Aizawl hi an insiamṭha nghal a, Serchhip (4-1), Siaha (5-1) leh Champhai (2-1) hnehin final an lut.

Aizawl tana buaina tur erawh match an khelh tawh zawng zawngah goal an la chhuah vek hi a ni a, match li a khelha goal riat khung thei Lalthangliana neitu Kolasib lakah fimkhur a ṭul ang.