Mahuma Memorial I Div Kulikawn-in Zemabawk an hneh hram

Mahuma Memorial Cricket Tournament nimin inkhel inhnehtawk takah Kulikawn chuan wicket thumin Zemabawk an hneh hram.

Ṭhumvawra vannei zawk Zemabawk-in Suaka Cricket Ground-ah bat hmasak an thlang a, mah se tun inelnaa wicket la hnem ber dinhmun chelh mektu H. Zothanchhuanga an ngam lo - over nga lek a vawmah run 25 chiah pein wicket nga a rawn la a, Zemabawk-in over 25-ah run 102 bak tlin thei loin an out vek a ni.

Kulikawn-in target sang lo tak nei mah se an beisei ang ngawt erawhin an bat bik lo - top five batsman zingah run nga aia tam siam thei an awm lo a, Zemabawk an chak mai dawn niin a lang. Mahse, Lalbiaktluanga (38) leh Rosiamliana Ralte Junior (21) ten team mualpho lutuk tur an rawn chhanhim a, over 39.3-ah wicket sarih hloh chungin an target hi an umpha ta a ni.

Nimin Inkhel Result
Zemabawk Pitchers: 102/10 (25) bt Kulikawn CC: 103/7 (39.3)
*Wicket thumin Kulikawn an chak

Vawiin Inkhel Tur
09:30 AM Ramhlun Venglai vs Tlangnuam CC