Bengaluru tan khualmualah fiahna

Indian Super League khelh mekah Bengaluru-in match hnih khelh tawhin hnehna an la chang ve ve a, hmahruaitu dinhmun an luah mek. Bangalore club hian zanin dar 8:00-ah fiahna an hmachhawn dawn a, khualmualah FC Goa an lenchilh dawn - mikhual khelmuala an lenluhna hmasa ber tur a nih avangin Albert Roca naute tan fiahna a ni ang.

Bengaluru-ah Mizo tlangval

Lalthuammawia Ralte Malsawm-zuala, Daniel Lalhlimpuia leh Zohmingliana Ralte awm mah se goalkeeper Thuama hi a inhliam avangin a la inlan thei lo a, Daniel hi reserve squad-ah awmin Sawmtea leh Zotea Ralte te an la inlan rih lo bawk. FC Goa-in Mizo rawlthar Lalawmpuia kawl mah se ani pawh hi reserve squad-ah dah a ni.

Bangalore club hian match hnih an khelh tawhah goal nga khungin goal khat chiah an la chhuah a, FC Goa-in match hnih an khelh tawhah vawi khat tlawma vawi khat hnehna changin goal li an khung tawh a, goal khat an chhuah tawh - zaninah goal kan hmu hnem a nih pawhin a mak lo ang.