Bale-a hoin Real-in Spanish Cup last 16 lut

Hliam vanga rei tak a inlan loh hnuah Real Madrid chhandam turin Gareth Bale-a inlar a, Spanish third division club Fuenlebrada laka mualpho thei dinhmuna ding Spanish champion hi si an phurh reng hnuah an goal hnih khung tur a thawhchhuah sak.

Thawhlehni zan khan team pahnih hi Spanish Cup last 16 luh inchuhin an inkhel a, 2-2 in an inhnehtawk. Real-in first leg-a 2-0 a hnehna an chan an ṭhatpui a, last 16 lut turin inkhel pahnih belhkhawmah 4-2 in an chak.

Inkhel chu

Santiago Bernabeu-ah Real Madrid coach Zinedine Zidane-a'n a player ṭha rual a chawlh hahdamtir a, B team tia chhal theih a luhtir. Third division club Fuenlebrada-in Spain stadium hmingthangah zam an tum lo a, hnehna chan an tum ngam - minute 25-na lekah goal hmahruai an khung a, midfielder Luis Milla chuan Real keeper Keylor Navas man phak lohin mawi zetin a khung.

Real player an hawihai a, Santiago Bernabeu a reh. European champion-in third division club lakah si an phur a, sut ngei tumin theihtawp chhuah mah se Zidane-a'n khawvel player manto ber lo ni tawh Gareth Bale a luhtir hma chuan Real-in eng ruai an ang lo - goal dang lut loin chawlhlawk hman a ni.

Hei le Bale!

Hliam vangin thla hnih chhung ngawt Bale a inlan tawh lo a, minute 62-naah Zidane-a mangangin a luhtir. Welsh forward hian khelmual a rah aṭangin danglamna a thlen nghal a, Fuenlebrada goal lamah ball tlanluh puiin Borja Mayoral tan a cross phei a, kum 20 mi striker hian an si phurh sutna goal ni turin a khung.

Minute riat a liam a, Bale bawk a inlar. Kum 28 mi forward hian Fuenlebrada goal-ah shot a nei a, goalkeeper Pol Freixanet chuan lo dang perin a per lehlam hi Mayoral chuan an goal hnihna ni turin a khung - Fuenlabrada an beidawng duh bik lo a, substitute Alvaro Portilla chuan minute 89-naah an si phurh a sut. Mahse, Spanish third division club hian an khelmuala goal hnih an chhuah leh Bernabeu-a Gareth Bale hliam damhlim an ngam lo a, last 16 luh an beiseina a bo.

Zidane a hlim

Real-in an beisei angin awlsam takin hnehna chang lo mah se Gareth Bale, Keylor Navas leh Mateo Kovacic te hliam vanga an inlan theih lo reng hnuah an inlan theih avangin coach Zinedine Zidane chuan a hlim thu a sawi.

French manager chuan, "Gareth, Keylor leh Mateo te hi hliam vangin hun engemaw chen chu an inlan thei tawh lo a, zaninah an rawn kir leh tak avangin ka lawm takzet a ni. Kan team tan player pawimawh tak tak vek an ni a, kan hmaa game hautak hmachhawn thei tura an awm leh ta hi ka lawm hle," a ti.

Zidane-a thlirletna

Real-in an khelmualah awlsam taka hneh theih tur nia lang Fuenlabrada an in draw pui hram a, Zidane-a'n an result vanga a hnual loh thu a sawi. Kum 45 mi manager chuan, "Kan result avangin ka hnual lo a, game harsa tak kan hmachhawn dawn tih ka hre sa a ni. Last 16 kan luh avangin ka hlim a, kan khingpuite khan an khel ṭha em em a ni," a ti.

Zidane chuan sawi chhun-zawmin, "Mipui chuan an duh duh an sawi thei alawm. Mahse, an player ten theihtawp chhuaha an khel lai kha an hmuh hmaih ka ring bik lo," a ti a, hnehna chang lo mah se a naute chuan theihtawp an chhuah thu a sawi.