William leh AFC-in East Bengal barakhaih

Salt Lake Stadium-ah East Bengal-in Aizawl FC lakah goal hnih khung hmasa mah se Mizo club-in Mizo tlangval William Lalnunfela hmangin an chhanglet a, 2-2 inkhel a tawp.

Season liam taa Aizawl FC-in I League an champion ṭum khan Red and Gold nena inhnehtawkin bul an ṭan a, tun season-a bul an ṭan dan nen a danglam lo.

Thawhlehni zan inkhelah hian East Bengal-in Eduardo Ferreira (66') leh Yusa Katsumi (72') te goal hmangin goal an khung hmasa a, Aizawl FC-in minute 74-naa William Lalnun­fela hmanga an si phurh an sut ṭhen hnuah Kolasib tlangval William bawkin injury time minute linaah goal pawimawh a khung.

Aizawl FC hian December 13, tlai dar 2:00-ah Churchill Brothers an mikhual ang a, hemi hma hian Mizoram Police nen December 4, Thawh-

ṭan zanah Mizoram Premier League Season 6 semifinal second leg an khel ang.

AFC hmaah hmelhriat

Indian football hrechiangtu Khalid Jamil-a'n Aizawl FC champion-na kawnga a hman thiam Mahmoud Al Amna chu midfield-ah hna pawimawh a tuk sak a, Hunthar tlangval Brandon VL Remdika'n inkhel bul a ṭan bawk.

I League-ah Under 22 player pakhat talin inkhel bul an ṭan a ṭul avangin Lalramchullova aiah Mehtab Singh thlan a ni a, amaherawhchu minute 39-naah Chullova hi luhtir leh tho a ni. Sialhawk tlangval R. Laldanmawia erawh inhliam vangin squad-ah dah a ni lo.

Aizawl FC-in an player pawi­­mawh Anrei Inonescu an chhawr thei lo chungin defensive game khelh an tum bik lo a, forward pahnih dahin William leh Japanese forward Yugo Kobayashi te bul ṭantir an ni.

Kolkata club an ṭha

Salt Lake Stadium-ah ṭantu ngah zawk leh team din thar nana sum seng hnem zawk East Bengal-in inkhel an thunun nghal a, Syrian midfielder Amna-a champion hnuah kum khatin upat belh mah se a thiamna a la chuai lo.

Kum 34 mi Amna leh Tri­­ni­dadian forward Willis Plaza te inthlawp chu Aizawl FC tlarhnung buaina a ni a, Japanese midfielder Katsumi leh Mizo tlangval Brandon te an tel bawk avangin Aizawl FC-in dawl zawh loh hun an nei dawn tih a hriat theih. Amaherawhchu AFC hian minute 45 chhung an dang thei a, goal thun loin dressing room an pan ve ve.

Second half-ah Red and Gold-in an phu angin goal an khung a, Katsumi corner pet chu Brandon-a'n a tauh per hnuah vengtu nei lo Eduardo Ferreira-a'n a tauh goal.

East Bengal ṭantute phurna tizual turin minute li hnuah Mohammed Rafique-a through ball chu Katsumi-a'n su per fuhin Aizawl FC goal-ah a lut leh bawk.

Tlawm duh lo Mizo tlangval

Aizawl FC midfielder David Lalrinmuana'n season hmasaa amah chhawr duh lotu East Bengal lakah freekick a pet a, Kareem Omolaja-a'n a tauh per hnuah William-a'n a tauh goal.

Point hmu turin Aizawl FC-in goal dang an mamawh - David-a thlaktu K. Lalṭhathanga'n injury time-ah corner pet ve lehin East Bengal tlarhnung lamin hmun himah an pet chhuak thei lo a, William-a'n nang fuhin a pet goal.

Goal dang luh belhna hun a awm tawh lo a, Aizawl FCṭantute an lawm laiin East Ben­gal ṭantuten thil thleng mak tiin an thlir thung.

Hero of the match an thlan hma hret avangin Yusa Katsumi hnenah hero of the match lawmman pek a ni a, lawmman phu zawk William erawhin fak a hlawh thung.

Kolasib tlangval hi season liam taa I League champion-na goal khungtu kha a ni.

An lawm lo

East Bengal coach Khalid Jamil chuan, "Concentration hloh vangin point hnih kan hloh a ni. Freekick leh corner aṭanga goal chhuah kha defending chhiat vang a ni a, kan vai tihsual a ni a, inkhelh leh hunah chuan tun aia ṭhaa kan khelh a ṭul a ni," tiin an chak zawh loh avangin a lawm lo.

East Bengal hian December 3 khian Kolkata Derby-ah Mohun Bagan an hmachhawn dawn a, Mariners hian an match hmasa berah Minerva Punjab an draw ve bawk.

Aizawl FC coach Paulo Meneses-a'n a sawi lawk ang ngeiin Kolkata-ah point hlu tak hlawh chhuak mah se Mizo club an enkawl danah a lawm lo.

Portuguese coach Paulo chuan, "Training-na ṭha min pek loh vangin Albert leh Sena te kan chân a, inkhel pawimawh hmachhawn tur chuan kha aia ṭha kha kan phuin ka hria. Referee pawhin East Bengal an hlauah ka ngai bawk. Vawi 17 foul an nei a, yellow card pakhat pawh an chawi lo. Keini lamin vawi 10 foul kan nei a, yellow card pali kan chawi thung," tiin a lawm loh thu Vanglaini a hrilh.

Engtin zel?

A player thlan dan chung­chang sawiin Paulo chuan, "Inhliam vanga chhawr theih loh ka ngah a, chuti chung chuan tlarhnung lam player ka rem tam chuan East Bengal ka hlau tihna a ni dawn a, chu chu ka duh lo a ni. Halftime-ah pawh chak tuma lut turin ka hrilh a, set piece hmang

ṭang­kai turin ka hrilh bawk," tiin I League champion an nih anga Kolkata laka inkhelh ṭan hma hauha tlawm sa nih a duh lo.

AFC hian inkhel tura Kol­­­kata zin zingah Albert , Liandala (Sena) leh Inonescu te an chhawr thei lo. S. Mal­sawmtluanga, Jona­­than Lal­rawngbawla leh Ro­chharzela te chu an inhliam bawk.

MPL a thlir e

MPL chungchang sawiin Paulo chuan, "Player ṭhenkhat hi an dam hman ka beisei a, final thlen tumin theihtawp kan chhuah ang," tiin tualchhung football inelnaa an rilru an sen leh tawh tur thu a sawi.