A hun a thleng ta . . .

Beisei ngam chi a ni lo a, zaninah erawh kan beisei ngai loh inkhel Lammualah kan hmu dawn. Khawvel league ropui ber pathumna ni mek Bundesliga-a pakuana ni thei TSG 1899 Hoffenheim leh Mizoram XI te chu zanin dar 8:00-ah Lammualah an inkhel dawn a, ticket nei leh sawm bikte chauhin a hmunah an en thei ang.

Lammualah German an rawn kal dawn a, mipuiin an hlut avangin hun rei lote chhungin ticket hralh zawh vek a ni. Lammual leng tawka ticket siam a nih avangin ticket hi siam belh a nih tawh loh avangin inkhelh hmain lei tur a awm dawn lo.

Ticket nei lo leh sawm bik nilote tan television-ah en theihin a awm dawn a, 'ticket' chang lote hriatthiamna dilin Lammual pan lo turin MFA-in a ngen. Tun inkhel hi khawvel hmaa Mizo hming lan theihna tur a nih avangin ruahhmanna awmsa hi mipuiin kan ngaih pawimawh a ngai a ni.

Tlai dar 5:30-ah Lammual Gate hawn a ni dawn a, zan dar 7:00-ah entertainment programme ṭan a ni bawk ang. Mipui en duh ber Mizoram XI leh Hoffenheim inkhel hi zan dar 8:00-ah ṭan tur a ni, team pahnih hian inkhelh ṭan hmain warm up an nei dawn, chu chu en tham a tling ang. 

En tur a awm dawn avangin kal hma a finthlak a, ṭhutna chungchang avanga buaina awm lo turin kal hma a pawimawh bawk. Inkhel en tur zawng zawng tan parking a awm dawn lo tih hriat a ṭha a, lirthei avanga ṭhutna ṭha chan loh emaw inkhel a ṭantirh aṭanga en loh hi theih tak a ni. Heng zawng zawng hi pumpelh turin inkhel en turte kal hma ṭheuh i tum ang u.

Inkhel entute tana a awlsam zawk nan Mizoram XI leh TSG 1899 Hoffenheim squad tarlan a ni. Mizoram XI jersey hi www.vanglaini.org-in a sponsor a, Mizoram Premier League club tam zawk angin an jersey hi Rin Rin kut chhuak a ni.

Hoffenheim striker Kevin Volland hi Germany-a koh a nih avangin Aizawlah a rawn kal a rinawm lo a, a hnuaia player hming tarlan hi Hotel Regency-a room an book sakte an ni.

TSG 1899 Hoffenheim team-ten nimin zing khan Lammualah MFA Grassroots naupangte an tlawh a, hun rei hmang hman lo mah se naupang tan zir zui tur an hnutchhiah.

Hoffenheim player- ten zing karah Lammual an pan dawn a ni tih hriain Grassroots a tel  lo  Mizo naupangṭhahnem tak German club-te training pe lai thlir tumin an pung khawm a, Grassroots naupang-te pawh an nu leh paten camera nen an ṭawiawm ṭha viau bawk. Hoffenheim player zawng zawng an kal lo a, vice captain Eugen Polanski, Tobias Strobl, Kingsley Schnindler leh Joseph Cluade Gyau bakah coaching staff- te an kal. Hoffenheim aiawhte hian Grassroots trainer-te thil thar an hrilh a, naupang an zirtir bawk. Hun hlimawm tak an hman zawh hnuah thlalakna  hun  neiin he hun hi tihtawp a ni.

 MFA Grassroots development officer Francis Paul chuan, "Hoffenheim team- te hun chep tak kara Grassroots naupangte nena hun an hmang ho thei hian MFA-in grassroots a ngai pawimawh tih a lantir a, MFA chungah kan lawm hle. Grassroots hi a bul ṭanna chauh a ni a, hmasawn zel kan tum. India rama hmasa ber kan ni a, Hoffenheim- in min tlawh  tawh a, hmasawn zawnga kan kal zel thei hi a lawmawm a ni," tiin a sawi.

Hoffenheim athletic coach Ottmar Rosch chuan,  "German naupangte nen danglamna a awm lo, hun rei lote chhungin kan thil zirtir angte an thiam thei zel. Hetiang renga hma an sawn chuan thui tak an kal thei ang," tiin Mizo naupangte chunga beiseina a neih thu a sawi lang.

Mizoram XI leh TSG 1899 Hoffenheim an inkhel a, Bundesliga-a pakuana team hi 3-0 in an chak.

Thawhlehni zanah Lammualah football hmuhnawm kan hmu a, Mizo mipuiin hmuhnawm kan ti a, German team-ten nuam an ti.

Hoffenheim-in team ṭha an ni tih an lantir a, Mizoram XI pawh an duai bik lo. Inkhel hmuhnawm tak kan hmu a, exhibition match a nih angin competitive match nena khaikhin chi erawh a ni lo. Hoffenheim tan Anthony Modeste, Eugen Polanski leh Jiloan Hamad-te'n goal khat ṭheuh an khung. Mizoramin goal thun theihna tur hun ṭha vawi thum an nei a, an khung lo.

German player ṭha pahnih Kevin Volland leh Sebastian Rudy-te an rawn zin lo a, anni pahnih hi Thawhleh zanah chiah khan Germany leh Poland inkhelah an tel. Heti chung hian Germany international tho captain Andreas Beck kan hmu.

Polish midfielder ṭha Eugen Polanski leh khawvel club ṭhaten an awh em em Brazilian Roberto Firmino te starting XI- ah an tel a; Lammualah ngei Mizo tlangval nen an inkhel a, ngaihtuah chian poh leh a makin a ropui lehzual.

Mizoram XI starting XI-ah I League player pali, India aiawha khel tawh ṭhiau S Malsawmtluanga, Jeje Lalpekhlua, Lalrindika Ralte leh Robert Lalthlamuana te an lut.

Tlarhnungah MPL best goalkeeper Lalawmpuia leh best defender Zothanpuia te kan hmu a, MPL best midfielder Reuben Zosangpuia, best forward MS Dawngliana leh best player R Malsawmtluanga-te erawh bench-ah an ṭhu.

Football tui tak tak tan chuan mumang ram a ni ber a, Hoffenheim player-ten Lammual an luh aṭangin mipuiin mak an ti, an che vel ringawt pawh a hmuhnawm. Football âtchilhtu tan chuan TV-ah chauh kan hmuh tur emaw kan tih ṭhin European player ṭhate Lammualah an inlan - mur sung sung lohna chi a ni lo! Lammual inkhel turte hi tun season-a Bayern Munich draw-tute an ni tlat - Bayern khelmualah 3-3 in an inhnehtawk.

Hoffenheim player-te'n khelmual an luah khat hneh a, heti chung hian Mizo player-ten ball an inpe kual ve thei reng a, mipui thawm a ṭha hle. German club- in minute thumna lekah French forward Modeste hmangin goal an khung.

Mizoram XI pawhin an si phurh sut theihna chance an nei a - Didika, Mama, Jeje leh H Lalmuankima-ten goal thun theihna remchang nei a, an thun lo vek.

Hoffenheim goal hnihna hi Polish international Polanski-a'n counter attack aṭangin chiang takin minute 27-ah a khung - goal hnihna luh hma hian German mikhual goal ban hi Mizoram lamin an tihper.

Halftime zawhah team pahnihin player an thlak danglam nasa a, Jiloan Hamad chuan second half minute hnihna lekah defender tihsual nang chingin goal thumna a khung a, 3-0 in inkhel a tawp zui.

Tun hmain Mohun Bagan-in an mikhual Bayern Munich hmaah goal khung theihna hun an insiam lo a, India team-in an mikhual Bayern Munich hmaah an khung thei bik lo. Mizoramin German club Hoffenheim hmaah goal an khung thei lo a, goal khung theihna tur erawh an nei ṭha takzet.

First half-ah MK-a'n hnai takah chance a nei a, mah se keeper Jens Grahl tan dan harsa a ni lo. Didika'n goal thun a tum a, vanneihna zawngin goal-ah a pet nual a, a lut lo. Didika hian Mama cross tauh luh theihna remchang a nei a, a tauh fuh lo.

Jeje-a'n ball a chang tam lo a, Lalruat- thara cross erawh a tauh lut teuh hle, goal ban a per. Mama'n dinglam kil aṭangin a ke vei lamin ṭha zetin a pet a, goal sirah chiah a kal.

Second half-ah Reuben-a freekick a kawh ṭha a, goal zawnah a kal lo. Santosh Trophy captain Zico Zoremsanga'n keeper chauh hmachhawn mah se a khung thei lo a, chance ṭha a hlah. F Lalrinpuia chance ṭha neih tur erawh Niklas Sule-a'n a titlu a, Sule hi he exhibition match-a yellow card hmu awm chhun a ni.

Hoffenheim-in Mizote tan zir tur tam tak an hnutchhiah a, an chevel hrim hrim kha zir tham a ni. Polanski-a'n midfield a thunun a, Brazilian Firmino beisei angin in 'show' thei lo mah se a hnampui Bruno Nazario erawh a hmuhnawm. Modeste chevel hmuh a nuam.

Hoffenheim tlarhnung ṭhat leh ṭhat loh hre turin Mizo player-te'n an su hneh tawk lo a, chu ti chung chuan an hmuhnawm hle. Defender lai pahnih David Abraham leh Janick Vestergaard-te an lian ṭha a, ball pet miah lo pawh ni se hmuhnawm khawpin an pa lian a, mipui lawm ṭan hlawh.

German club-in ball an chang tam a, ball pawh an in-pass hnem zawk. Minute 90 chhungin vawi 731 zet an in-pass dik laiin Mizoram lam vawi 257 chiah an pass dik.

Hoffenheim lam ball inpek dik zat (passes completed) hi 83.64% a ni a, an in-pass sual ve mang lo tihna a ni.

Team pahniha player-te hlawh a intam hleih ang bawkin an thiamna pawh a la inthlau - Mizoramin chance an neih vete erawh vanneih ni-a goal thun theihna tur chi a ni ve tho.

Hoffenheim coach Markus Gisdol chuan, "Player-ten nuam an ti a, kan khingpuite an khelh danah fak an phu hle a ni. Inkhelh chhung zawngin nung takin an khel thei a, goal thun theihna tur chance ṭha pawh a nei. Result hi a pawimawh ber a ni lo a, mipui phurna kan hmu ringawt kha keini tan lawmna tham a tling a, Mizorama kan thil tawn hi kan hre reng tawh ang," tiin a sawi.

Mizoram head coach H. Vanlalthlanga chuan, "Europe club ṭha kan hmachhawn thei hi kan lawm a, kan la inthlau deuh a ni. MPL zawhna a rei deuh tawh avangin kan fitness a tlahniam ve deuh a, kha aia ṭha tur chu kan ni. Europe team ṭha nen khaikhin chi kan ni lo a, mahse kan khelh dan thlirin Mizote hian kan nun kan uluk chuan India ramah chuan kan lang thei tih a chiang. Chu chu ka lawmna a ni," tiin a sawi.

Mizoram XI leh TSG 1899 Hoffenheim- te inkhelh zawhah, German club chah chhuah theihna tura mi pawimawh Arunava Chaudhuri, Chris Punnakkattu Daniel, PFAI President Renedy Singh, MFA president Lal Thanzara leh MFA honorary secy Lalnghinglova Hmar ten Press mite an hmachhawn a, Exihibition match huaihawt danah an lawm tih an sawi.

Adamant Sports Management AG-a project director Arunava chuan, "Mizoram-a rawn zin hi a awlsam lo a, kar liam ta Zirtawpni thleng khan he thil hi ṭhulh theih a ni tih Tetea nen chuan kan chiang a, midang kan hrilh lo. MFA secy-in a tih tur a ti a, keiin ka tih tur ka ti a, tun hun hi kan thleng thei a ni. Hoffenheim player-te hi private jet-a thlawk ṭhin, airport-ah pawh midang nghak buai ngai lo an ni a, Lammuala an inkhel thei hi a ropui a ni," tiin a sawi.

Exhibition match-a commentator ni bawk Arunava chuan, "Mizo player-te an khel ṭha a, German club ṭha hmaah an zahpuiawm lo. Mipui kha an ropui thlawt, he exhibition match hi a hlawhtling a ni," tiin a sawi.

Indian professional footballer-te hotupa Renedy Singh chuan, "Mizoram  kha  an khel ṭha, an khelhpui team Hoffenheim khan Bayern Munich an draw thei, chu chuan an ṭhatzia a lantir," tiin a sawi. Arunava chuan lo sawi chhunzawmin, "India player zingah chuan Renedy hi ke veilama ball pet thiam bera chhal theih a ni a, Larindika hian Renedy hi a la tluk thei a ni," tiin Mizo tlangval a fak.

Vanglaini palai chuan, "I lo zin hmasak khan, tuna a hlawhtlin chuan an rawn kal leh ang i ti a, a hlawhtling em?" tiin Arunava a zawt. German team hruai luttu chuan,"Hlawhtling tehreng e, mipui kha en ila a hlawhtling tih a chiang. Lo kal leh dan tur kan ngaihtuah ang, Rajiv Gandhi Stadium sak zawh hunah phei chuan inkhel buatsaih a awlsam lehzual ang," tiin Mizorama club ṭha hruai luh leh a tum.

Inkhelh phalna hi UEFA, Bundesliga leh Germany Football Federation bakah AIFF- te dil a nih thu leh, thil buaithlak leh hautak a nih thu MFA Hony Secy chuan a sawi lang bawk.