Chhinga Veng ngamtu Chawnpui FC-in MPL9 final an hnaih

Honda MPL9-ah coach ṭha Lalsangzuala Hmar-in a theihna a pholang a, Nilaini zan khan khan Sanga kaihhruai Chawnpui FC-in Chhinga Veng FC 2-0 in an hneh. Amaherawhchu, inkhel hi semifinal first leg chauh a ni a, minute 90 khelh tur a la awm avangin Chawnpui tan final la luh loh theih a ni.

RG Stadium-a inkhelah Chawnpui tan Laltlanzova'n first half-ah goal hmahruai a khung a, second half-ah MC Malsawmzuala'n a khung belh. Chhinga Vengin bench aṭangin Lalrinzuala luhtir mah se a chhanletna an nei lo a, 2-0 in inkhel a tawp.

Inkhel chu
Chhinga Vengin chance an nei hmasa a, Silvana R. Lalruatkima ball pek luh chu Lallawmtluanga tan chance ṭha ni mah se Chawnpui captain Lalrinchhana Tochhawng a inrawlh hman.

Chawnpui erawhin an hun ṭha neih an hmang ṭangkai a, freekick aṭanga ball vawrh luh satliah chu MC-a'n tauh letin 2022 Inter Village top scorer Zozoa'n mawi zetin a pet goal.

Chhinga Vengin ṭum dang an pha lo a, semifinal boruakah an talbuai. Second half-ah pawh Chawnpui an khel ṭha zawk a, K. Lalruatdika (Teka) cross chu ṭha viau mah se Chhingcows keeper RS Lallawmzuala a inrawlh hman.

Minute 56-naah Chawnpuiin goal hnihna an khung a, corner aṭanga ball kal chu MC-a'n goal kilah a tauh lut. Keeper Lawma tan dan ngaihna a awm lo a, chutihrualin near post-a player a dintir loh chu a goal-na chhanah a ngaih theih bawk.

Chhinga Vengin siphurh sut ṭhenna remchang an nei a, Silvana-a'n hnai tak aṭangin goal zawnah a tauh thei lo. Chhingcows-in hun tawp lamah an nawr na a, keeper Lawma'n ball a vawrhluh nasa a, hun hma hretin Silvana-a'n chance ṭha bik nei lehin goal-ah a chantir thei lo.

Engtin zel?
Chawnpui leh Chhinga Veng te hian November 26, Inrinni zan dar 7:00-ah second leg an khel leh dawn a, Sanga hote dinhmun ṭha mah se la chesual thei an ni.

Siaha tlangval MC-a'n first leg-a goal a khung avangin goal riat a khung ta a, goal khung tam ber a ni mek. Mizo striker langsar zinga mi Malsawmfela'n season ṭha tak hmangin goal sarih khung mah se Mizoram Police-in semifinal an thlen phak loh avangin top scorer a ni dawn lo. Sawmfela hi MPL-ah top scorer a la ni lo!

Semifinal
FIRST LEG
November 22, Thawhlehni
Aizawl FC 3 - 3 FC Venghnuai
AFC : Lalmuanawma (Munez) 26', MS Dawngliana 29', K. Lalrosanga 45+3'
FCV : Lalruatfela 16'; C Ramdinmawia 58'; Malsawmzuala Tlangte 73'
MoM: MS Dawngliana, Aizawl FC

Player inlan
AFC: Vanlalhriatpuia (Lalhruaitluanga 64'); Rohmingthanga, Lalmuanawma (Munez), Ramngaihsanga, Zodingliana;
David Lalhlansanga, Joseph Vanlalhruaia (Lalchhanhima Sailo (82'), K. Lalhmangaihkima (C), Lalthankima (Augustine Lalrochana 64'); MS Dawngliana, K. Lalrosanga (Jeremy Laldinpuia 46')
FCV: Joel B. Lalramchhana; C. Ngurnuntluanga (C. Ramnunpuia 19'), Lalnunsiama, Lalruatfela, C. Ramdinmawia, H. Lalrempuia; Lalruatfela (RF-a), Peter Lalrinhlua (Lalbiakzuala Chawngthu 65'), Thangzawmsanga (Eric Remruatpuia 65'); Vanlalthanga, Malsawmzuala Tlangte

November 23, Nilaini
Chhinga Veng 0 - 2 Chawnpui FC
CVFC : Laltlanzova 15'; MC Malsawmzuala 56'
MoM: Laltlanzova, Chawnpui FC

Player inlan
CVFC: RS Lallawmzuala; Rorelliana (Laltluangliana 46') , Abel Lalruatfela, Lalbiakhlua, Lalmuansanga (Varun Raj Tamang 46'); F. Lalrohlua (M. Lalpektluanga 88'), Johny Lalremruata, Lalengzama Vangchhia, Silvana R. Lalruatkima; Lalrokima (Lalrinzuala 64'), Vanlallawmtluanga (Jerry Lalchhanchhuaha 46')
CHFC: Moses Lalbiakngura (Lallawmzuala 46'); C. Lalhunruata, Lalrinchhana Tochhawng, K. Lalruatdika (Teka), Lalramdisanga; Malsawmdawngkima, K. Vanlalhriatzuala, Lallawmsanga (Lalbuatsaiha 88'), Laltlanzova; Samuel Laltlanthanga (Lalliansanga 67'), MC Malsawmzuala (Vanlalhriattluanga 90')

SECOND LEG
November 25, Zirtawpni
FC Venghnuai 7:00 PM Aizawl FC

November 26, Inrinni
Chawnpui FC 7:00 PM Chhinga Veng FC