England an pâwr; an hlauthawng lo!
Khelmual an luh hma hauha sawiselna tam tak phur chungin England-in Qatar an pan a, an match hmasa berah goal ruk an khung nghal - zanin dar 12:30-ah England an inlan leh dawn a, USA an hmachhawn dawn.
Three Lions hian an match hmasa zawkah 6-2 in Iran an sawp a, English midfielder Declan Rice chuan, "World Cup ṭan hma khan min ringhleltu an tam em em a, an rin ang kan ni lo tih pholan kan duh a ni," a ti zui sak a, a ṭawng pawr hle.
England hian World Cup an khelh hmaa an match hnuhnung parukah chak an nei lo a, Nations League-ah League A aṭangin an relegate bawk - mahse, World Cup-ah thawnthu chu her danglamin a awm a, zaninah USA an hneh chuan last 16 lut ang hiala chhal theih an ni ang.
Kane a dam
England captain Harry Kane-a'n Iran nen an inhmachhawn ṭumin hliam a nei a, Three Lions fan-te hlauthawng hman mah se coach Gareth Southgate chuan a player a dam tawh thu a sawi a, Iran laka hliam vanga inlan lo Kyle Walker-a'n training a zawm tawh bawk.
Squad siksawi khat tak Southgate-a'n squad a tidanglam viauin a rinawm lo a, tlarhmaah Bukayo Saka, Kane leh Raheem Sterling te inkawp leh tura ngaih an ni a, USA tlarhnung tan hna a awlsam lo ang.
Jude Bellingham chu mipui mit fukna a ni leh dawn a, English midfielder tan zaninah inthlahdah a thiang lo. Rice chuan, "USA hi chu level sang zawk tur a ni," a ti a, Iran aia a dah san team lakah chak an tum dawn.
Mahse maw
England boruak a ṭha a, inrintawkna an ngah vanglai tak a ni. Mahse, kei ber emaw, intih lai hi insiamṭhat a ngaih hun lai tak a ni ṭhin a, USA lakah awlsam taka chak an inbeisei a nih chuan an tisual ang.
USA hian an match hmasa zawkah Wales chu 1-1 in an inhnehtawkpui a, England laka point an hlawhchhuah theih chuan an tan last 16 luh a awlsam sawt dawn tih an hai bik lo.
USA captain Tyler Adams chuan, "Wales kan draw hnuah insiamṭhatna remchang team ṭha tak lakah kan nei dawn. Kan hlauthawng lo - England an ṭha tih kan hria. Mahse, an player tam zawk hi Premier League-ah ka hmachhawn tawh a, team ṭha tak kan nei ve tho a ni," a ti.
Tute nge?
England player-te hi tute nge an nih inhrilh nawn a ngai lo - world champion nih tum ngam khawpin an squad a chhah a, Iran lakah pawh bench aṭanga Marcus Rashford, Jack Grealish leh Phil Foden te luhtir thei an ni.
Chutihrual chuan USA hi an chhe lutuk bik lo - Chelsea forward Christian Pulisic hi danglamna thlen thei player a ni a, Wales lakah Borussia Dortmund player ṭhangduang Giovanni Reyna chu bench-ah an dah thei!
Leeds United midfielder Tyler Adams ngaihthah a thiang lo a, Juventus midfielder Weston McKennie pawh lam hmaih atan chuan a uiawm - George Weah-a fapa Timothy Weah pawh theihnghilh loh a ṭha.
Wales an inpeih
Vawiin tlai dar 3:30-ah Wales-in Iran an hmachhawn dawn a, team pahnih tan chak loh a thiang tawh lo - Wales-in hnehna an chan chuan last 16 luh beiseina a sang sawt ang a, Iran tan beiseina thi tur chhem nung turin chak a pawimawh.
Wales boss Rob Page chuan, "Gareth Bale hian engtiklai mahin min hlawhchham tir ngai lo," a ti a, a forward chunga rinna nghah a sual ngai loh thu a sawi - vawiinah pawh Bale bawk hi innghahna a ni leh ang.
Iran tan England laka goal hnih khungtu Mehdi Taremi a ṭangkai leh dawn a, Feyenoord midfielder Alireza Jahanbakhsh pawhin a theihna sang ber a pholan a ṭul bawk.
Kan tum ber chu last 16 luh a ni a, USA lakah tih theih nghal kan duh. Mahse, Iran nen a danglam dawn.World Cup match hmasa ber khelh dawna kan rilru ang kha kan put leh a ngai - USA hi team ṭha tak, nawr na tak, thawk ho ṭha tak leh coach ṭha tak hnuaia khel an ni dawn. Premier League-a kan hriat player an kawl nual a, Wales laka first half-a an khelh dan kha a ṭha hle. Bul kan ṭan ṭha a, USA hmachhawn tura kan inpeih a ngai. - Gareth Southgate, England boss