Luis Enrique-a'n FIFA World Cup khel tur squad a puang a, Barcelona player pariat a koh laia Real Madrid player pahnih chiah a koh avangin an sawisel. Mahse, inelna an ṭan a, Enrique kaihhruai La Roja-in an thiamzia pholangin Costa Rica 7-0 in an sawp.
Spain hian goal sarih an khung ringawt lo a, game mawi an khel tel. Costa Rica-in La Roja hi dan ngaihna thlawt an hre lo. Enrique hote hian ball possession pawh 82% ngawt an nei a, minute 90 chhungin vawi 1045 lai an in pass thei a, an khelh dan hmangin champion rinkai an ni phak.
Fak phu Enrique Euro 2020-ah Luis Enrique-a'n Barcelona player-te hmun pawimawh a chantir a, World Cup-ah pawh Barca player te bawkin hmun pawimawh an chang. Midfield-ah kum 34 mi Sergio Busquets thlawp turin kum 19 mi Pedri leh kum 18 mi Gavi te an awm.

Gavi hi kum 18 leh ni 110 mi a ni a, Spain tana khel naupang ber niin goal a khung zui avangin Pele (1958) hnua World Cup-a goal khung thei naupang ber a ni bawk. Enrique hian ball pass thiam a thlang tih a lang a, Man City midfielder Rodri chu defence laiah club lama a khelhpui Aymeric Laporte nen a inkawptir bawk.
Spain-in ṭan phat aṭangin inkhel an thunun a, passing game mawi an chhawp chhuak. Kum 2022-a Golden Boy award dawngtu Gavi a langsar a, chawimawina a dawn laia a phu lo titute pawhin an ngaihdan an thlak thei hial ang. 
Barca-a inlan ṭhin Gavi aiin Spain kawr ha Gavi a ṭha zawk a, Busquets pawh a tar tawh tia sawi pawl awm mah se Spain kawr a hak chuan player dang daih a ni. Chutiang bawkin Jordi Alba pawh a la ṭha hle.
A tawi zawng chuan Xavi aiin Enrique-a'n player-te ṭhatna a pho chhuak ṭha zawk. Real Madrid leh Barcelona player hlui Enrique hian manager a nih hnuah Barcelona hi a treble champion pui thei a, La Liga leh Copa del Rey pawh vawi thum ve ve a champion pui theih avangin vanneih vanga khel ṭha an ni lo tih chu a chiang.
Fak zel ang World Cup ṭan hmain Valencia defender Jose Gaya a inhliam a, Enrique-a'n Barca wing back Alejandro Balde a thlang. Spain coach hian Barca a duhsak nia a lan avangin sawisel a tawk a, mahse a thlan chhan chu a chiang. Kum 19 mi Balde hian kum 33 mi Alba a rawn thlak a, mual vei lamah a tlan chakzia a pholang.

Kumin September thla khan Enrique thachhang dawltu Aitor Unzuu chuan Rodri chu defence laia sawn ngaihdan a nei tawh a, a fuhzia a lang. Costa Rica lakah tlarhnung aṭangin Spain team an in pass chhuak thei hle. Enrique hnuaiah Marco Asensio-a'n harhtharna a chang bawk.
Chutihrualin Spain hian bul an la ṭan chauh a, November 27, Pathianni zan dar 12:30-ah Germany an hmachhawn dawn. Hansi Flick-a hote hi an chak loh chuan tla thei an ni tawh dawn a, La Roja-in fiahna tak tak an hmachhawn ang.
Goal sarih chu 11' Dani Olmo: Box pawnah Olmo-a'n Gavi ball a pe a, Barca midfielder hian fing takin box chhungah a pe lut. Olmo hian ball nen defender virpuiin mawi zetin goal hmahruai a khung. 21' Marco Asensio: Sergio Busquets-a'n mual vei lama awm Jordi Alba a pe a, Alba hian cross nghalin Real Madrid forward Asensio-a'n vawi khatah pet nghalin Costa Rica keeper Keylor Navas-a'n a dang hman lo. 31' Ferran Torres: Spain wing back Alba-a'n Óscar Duarte lakah penalty a hlawh chhuak. Ferran Torres rawn pen chhuakin cool takin keeper Navas a bum. 54' Ferran Torres: Spain-in a khat mawi tawkin an khung a ni ber. Torres-a'n Gavi hnen aṭanga a ball hmuh chu la fuh tawk lo mah se ball per chu chang lehin rang taka virpuiin a ke vei lamin a pet goal. 74' Gavi: Spain tan khel thei naupang ber Gavi-a'n a thiamzia a pholang a, ball pass chauh a thiam tih a lantir hnuah goal pawh a khung thiam tih a pholang. Box pawn vei lam aṭanga Morata vawrh chu Gavi-a'n a kang laia pet nghalin chiang zetin goal-ah a lut. 90' Carlos Soler: Minute 90-naah dinglam aṭanga substitute Nico Williams-a ball cross chu Navas-a'n nam per ṭha tawk loin substitute Carlos Soler-a'n a pet goal. 90+2' Alvaro Morata: Morata leh Olmo ten wall pass hmangin Costa Rica tlarhnung an ṭhiat a, Morata hian ṭha zetin goal kilah a pet lut.