Japan lakah Germany an pawr sual

Football-ah Asia ramten nasa takin hma an sawn tih a lang a, Saudi Arabia-in Lionel Messi telna Argentina an hneh aṭanga ni khat hnu lekah Japan-in Germany an barakhaih. Asia ram hnehte hi team satliah an ni lo - FIFA World Cup 2014 finalist-te an ni.

An inlehthal
Khalifa International Stadium-ah Germany-in inkhel an thunun a, minute 33-naah Ilkay Gundogan-a penalty hmangin hma an hruai. Hansi Flick-a hote hi awlsam takin an chak dawn emaw tih laiin Japan coach Hajime Moriyasu-a'n substitution awmze nei a siam a, result a inthlak hlawk.

Minute 75-naah substitute pathum Kaoru Mitoma, Takumi Minamino leh Ritsu Doan ten Germany bang an su chim. Vei lam kil aṭangin Mitoma-a'n ṭha takin a la lut a, a cross ball chu Minamino-a'n goal-ah petin Manuel Neuer-a'n a dang. Mahse, hemi per hi Ritsu Doan-a'n chiang zetin a pet goal.

Minute riat hnuah freekick aṭanga defender Kou Itakura ball vawrh luh chu offside trap bumtu Takuma Asano-a'n ṭha taka ball la thlain angle zim tak aṭangin ṭha zetin a pet goal. Germany-in a chhanletna an nei lo.

Pawr sual
Germany hian ball possession 74% an nei a, shot pawh vawi 26 hial an nei. Mahse, Japan hi inkhelh ṭantirh aṭangin an tumah an chiang a, tlarhnung an tih phui ṭhat bakah ball an changin an chi ai lo.

Flick-a hoten inkhel thunun mah se Japan hian goal chance an nei a, Daizen Maeda goal khung chu offside vangin pawm a ni lo. Germany goal khungna hi penatly a ni a, first half tawp hma hreta Kai Havertz goal khung erawh offside vangin pawm a ni lo.

Second half ṭantirh lamah pawh Germany-in inkhel an thunun a, defender Antonio Rudiger pawhin uang thuang takin Japanese player a tlan khum. Mahse, Germany an pawr sual a, Japan-in an lehthal - goal hnih an chhuah meuh chuan Rudiger pawh a hawihai hle.

Joachim Low thlaktu coach Flick pawhin mawh a phur. Bayern Munich manager hlui hian an ṭhat dan ber tun thlengin a la hre fuh thei lo a, Japan lakah tlarhnunga bul ṭantu Niklas Sule, Nico Schlotterbeck, Antonio Rüdiger leh David Raum te kha an palia bul an ṭan vawi khatna a ni.

Flick-a'n substitution a siam fuh tawk lo niin a lang bawk a, Thomas Muller leh Ilkay Gundogan te a lakchhuah hnuah Germany-in inkhel thunun an harsat. Chutihrualin Germany an vanduai ve bawk - inelna ṭan hmain Timo Werner a inhliam a, Leroy Sane pawhin hliam vangin Japan a hmachhawn thei lo.

A tawi zawngin Germany tlarhma a bil a, tlarhnung a pawp - match hmasa bera Blue Samurai an hneh loh avangin second round luh a harsa tawh khawp ang.