Germany hnehtu Japan chu

Hajime Moriyasu, head coach
Japan Football Association hian foreign coach-te an lo ruai tawh ṭhin a, tun ṭuma enkawltu erawh Japanese Hajime Moriyasu a ni. Kum 54 mi Moriyasu hi 2018 World Cup-a assistant coach kha a ni a, Olympic hnuhnung ber Tokyo-ah khan Japan mipa team enkawl tawhin Qatar an thlen theihna tura an thluak bur a ni.

Japan a enkawl hma hian Moriyasu hian a club khelhna ṭhin Sanfrecce Hiroshima chu enkawlin J League-ah vawi thum a champion pui tawh a, Japanese Super Cup-ah vawi hnih a chakpui bawk.

Kum 2018 aṭangin Japan hi a enkawl ṭan a, 2019 Asian Cup-ah khan an ram team hi final thlenpui mah se Qatar lakah an vanduai. Moriyasu hi player ang pawhin chanchin a nei ṭha.

A inkhelh hunlaiin midfielder a ni a, kum 1992 khan Asian Cup-ah a vawi khat nan Japan a champion pui. Mahse, kum 1993 khan hun tawp dawna goal an chhuah vangin Iraq an hneh lo a, World Cup an khelh loh phah. Hemi ṭuma qualifying tournament an khelhna hi Qatar a ni. Kum 29 hnuah erawh Moriyasu hi Doha-a thilmak a thlen theih nana mi pawimawh a ni.

Chakna goal khungtu
Takuma Asano hi Arsenal ṭantute chuan an hre ngei ang. Arsene Wenger-a'n London club a la enkawl lai khan Arsenal-ah a awm ṭhin a, work permit a hmuh theih loh avangin senior team tan erawh a inlan lo.
Kum 28 mi Asano hi winger ball thiam a ni a, tunah chuan VfL Bochum tan a khel mek. A club khelhna Bochum hi Bundesliga-ah 17-naah an awm mek a, German mi chu ni se Germany tan a khel pha lo ang. Amaherawhchu, kum 28 mi Asano hi Japan tan match 38 a khel tawh a, goal riat khung tawhin chung goal zingah chuan Manuel Neuer-a vena a goal khung hi sawi zui a hlawh ber ang.

Hriat zau nan
Tun ṭum hi Japan-in World Cup vawi sarih a zawna an khelhna a ni a, France 1998 kha an khelh hmasak ber ṭum niin Takeshi Okada enkawl Japan team-a player 22 kha J League-a mi an ni. Tun ṭumah erawh Japan squad-ah hian European club-a khel player 19 an awm a, Europe-a tawnhriat ṭha tak nei player pathum an la awm cheu bawk. Season tharah J League-in kum 30 a tling dawn a, kum 1993-a inelna ṭan a nih khan club 10 a zawm. Kum 2023-ah erawh division pathumah club 60 a awm tawh ang.

J League hian player ṭha tak tak an chher chhuak a, mahse J League chauh hi player ṭha siamtu a ni lo. Tun ṭuma squad-ah pawh hian player pakua chuan professional player an nih hmain university team-ah an khel phawt. Chung zingah chuan Brighton midfielder Kaoru Mitoma pawh a tel a ni.