Canada lakah Belgium an vannei hram
World Cup a nih tawh hi chuan a boruak a danglam a, rinlawk ang result a thlen bakah beisei loh tak tak pawh a thleng ve mek zel. Nilaini zan group F inkhelah pawh chak chiang tura ngaih Belgium an vannei hram.
Player ṭha leh hming langsar awmna Belgium hian Canada 1-0 in an hneh hram. Red Devils goalkeeper Thibaut Courtois chuan Alphonso Davies-a penalty bakah anmahni lama lut tur tam tak a dang a, an chak theihna chhan a ni.
Goal khat a tawk
Belgium hian World Cup hma inbuatsaihna hnuhnung berah Egypt an ngam lo, striker ṭha Romelu Lukaku chu hliam damkawr a nih avangin an la chhawr lo a, an team boruak ṭhat lai ber chu a ni hran lo.
Toby Alderweireld-a'n hla deuh tak aṭanga a ball pek dawngtu Michy Batshuayi chuan chawlhlawk hma deuhin goal awmchhun a khung. An goal neih chhun erawh ṭha tak a ni, ball kang leia tla rawn sawt leh chu laklawh nei miah lohin a tlawh lut.
Second half-ah pawh Canada bawk an hlauhawm, Jonathan David-a'n si phurh sut theihna remchang nei mah se a tauh goal lo a, keeper Courtois-a'n Cyle Larin a khung tur pawh ṭha takina dansak, penalty vawi hnih an beisei pek an ni lo bawk.
Martinez-a'n a fak
Belgium manager Roberto Martinez chuan, "Tun tournament hian nasa takin hmasawnna min thlen ngei ka beisei, harsa tak chung pawhin tun ṭuma hnehna kan chan hram hram ang hi a la pawimawh zel dawn.
"A nihna takah chuan kan khel ṭha tawk lo, mahse World Cup match-ah hnehna kan chang miau si. Canada khan tun aia result ṭha zawk kha kan phu an ti a nih chuan ka pawmpui thlap, kawng hrang hrangah khan keini aiin an ṭha zawk a ni," tiin a sawi.
Group H inkhel dangah Croatia leh Morocco te goal awm loin an lo inhnehtawk tawh a, chak lo Canada tan pawh last 16 lut turin beiseina a sang sang thei a, kawng zau takin a la inhawng - a zawna chak loh chi erawh a ni dawn lo.
Belgium dinhmun
'Golden Generation' ho hun a liam mek a, tunah World Cup an chawi a nih loh chuan engtik hunah ngei an chawi tawh chuan ang ni? an tan tun hi hun ṭha hnuhnung tia sawi theih a ni, a nih loh chuan rawlthar ṭha zawk rawn chhuah hun nghah a ngai ang.
Captain Eden Hazard kha player ṭha bik chu a ni tehmeuh mai, mahse tun dinhmunah chuan Real Madrid tana khel phak lo a ni, match a khelh tam a ngai - match hnihna aṭang chuan hmana Chelsea tana a khelh lai ang kha a lantir a ngai.
Kevin de Bruyne leh Courtois te hi chu midang chunga leng an ni. Mahse, defender rinrawl Alderweireld (kum 35) leh Jan Vertonghen (35) te an upa deuh tawh a, match hmasa bera an khelh dan thlir chuan tlarhnung lam an ngaihtuah awm viau.
Canada beiseina
Ahmad bin Ali Stadium chhungah khan Belgium ṭantu aiin Canada ṭantute thawm a ring zawkin a rinawm. John Herdman-a enkawl team hian mipui lam aṭangin thlawpna an dawng ṭha takzet, player pawh an phurin an thatho hle tih a chiang.
Davies-a penalty kha lut ta se chuan result a danglam mai thei, penalty an hlah bakah hun ṭha an khawhral hnem lutuk kha an ui ang, goal khung tumin vawi 22 ngawt pet/tauh mah se a hlawhtling lo vek.
Canada coach Herdman chuan, "Ka hmuh dan chuan group hmahruaitu nih theihna remchang kan nei, chumi tur pawh chuan kan bei nasa hle, mahse tuna kan awmna chu a mawngphah a ni. Khelh ṭhat mai bakah chak a ngai," tiin a sawi.