Ram tan inkhelh a ngai - Sergio Ramos

Real Madrid captain Sergio Ramos chuan Spain ram sum leh pai dinhmun siam ṭhatna kawng khat atan football khelh a ngai tih a sawi. La Liga hi June thlaah khelh chhunzawm theih an tum a, an dinhmun tur erawh a la chiang chuang lo.

March thla aṭang khan Spanish football hi Covid-19 vangin an chawl lailawk, tunah hian khelh chhunzawm tumin inbuatsaihna an nei mek; club tam zawk chuan training pawh an nei leh tawh.

Spanish La Liga thuneitu leh Ramos-a'n inkhelh duh viau mah se thil a chiang thei rih lo. Tun hnai khan Spanish league sang pahnih La Liga leh Segunda Division (LaLiga 2) player panga chuan coronavirus an kai tih hriat chhuah thar a ni a, an hming erawh tarlan a ni lo.

Hri kai player zawng zawng hi khung hran an ni a, an dam leh dam loh endik reng an ni ang. Endikna vawi hnih an paltlang hnua an fihlim tih chiangte chauhin team training an zawm leh thei dawn a ni.

La Liga president Javier Tebas chuan, "Kei chuan June 12 aṭanga season hman chhunzawm leh ka duh. Amaherawhchu a tawpa thutlukna siam theitu chu hriselna lama mi thiamte an ni," a ti. Mi panga in hri an kai thar chu mak a ti hran lo a, an beisei aia kai an tlem thu a sawi bawk.

Spain international Ramos chuan, "Ramin hun harsa a tawng mek a, engtikah nge he hri hi a reh ang tih pawh hriat a ni lo. Hri leng hian nghawng na tak a nei dawn, ei leh bar bakah ram sum dinhmun tlachhe nasa tur tun dinna kawng khat atan inkhelh a ngai. 

"Coronavirus kan hneh theihna tur ṭha ber nia ka hriat chu thuawih a ni. Thupek zawm ṭha ila, kan inkhel a nih pawhin player leh staff-te himna turin kan hruaituten hma an la ngei ang tih pawh a chiang," a ti.

European league lian zinga a hmasa ber turin Bundesliga chu May 16 aṭangin an khel ṭan leh tawh dawn. La Liga pawhin beisei an nei sang tawh hle. Ramos chuan, "Germany hian entawn tur ṭha tak min peah ka ngai. Chhungkua kan ngaihtuah lo thei lo, chutih rualin thil thleng thei leh a nghawng hrang hrang ngaihtuah chuan inkhelh leh theih hi a pawimawh hlein ka hria," tiin a sawi bawk.

La Liga match 27 an khelh tawh chinah khan Barcelona chu hmahruaitu an ni mek a, an hnuaiah hian an elpui leh hmelma ni bawk Real Madrid an awm - Spanish club lian pahnih inthlauhna hi point hnih chauh a la ni.

Real Madrid captain Ramos chuan, "Entu awm loa kan inkhel a nih chuan thil hi sawi lawk thiam a harsa zual hle ang. Sawi chian theih awm chhun erawh chu theihtawp kan chhuah ang a, nomawi chawi kan tum ang," tiin Barca chunga awm a duh.

Spanish football inelna sang berah hian Real Madrid (33 titles) chu record nei ṭha ber an ni. Mahse, tun hnaiah Barcelona an tluk lo - Catalan club lian hi tun hnai season hnih chhung an champion a, a zawna a vawi thum nan nomawi hnaih tawh hle.