Hlawhtlin chakin ka la tuihal reng - Djokovic

ATP Finals nomawi a chawi a, season harsa tak hmang mah se a tawp a khar ṭha viau. Novak Djokovic chuan a hlawhtlinna chante avangin a lawm tih a sawi, chutih rualin title lak chakin a la tuihal reng tih a sawi bawk.

Kum 35 mi Djokovic chuan, "Hliam leh harsatna dang vanga inkhelh theih loh hi a hrehawm ka ti ṭhin a, rilru hi a hnual nghal ruih ṭhin. Ka tan chuan kumin tir lam kha a harsa takzet tih sawi nawn ka duh.

"Tournament ka khel thei lo a, chu chuan ka nunah nghawng na tak a nei. Inelna ka hmachhawn ve leh chinah pawh tun hma anga ṭha taka khelh leh nghal kha a harsa, bul ṭan thar leh ni ang maiah ka inngai," a ti.

World ranking-ah pawh Djokovic hi nasa takin a hnung tawlh phah, tun dinhmunah world number 5 a ni a, season thara tournament a khelh leh hunah pawh seeded pakhatna a ni dawn lo, kawng a hautak phah hret ang.

Serbian star Djokovic chuan, "Australian Open 2023 ka khel thei dawn tih ka hriat khan ka hlim hle, vawi kua ka champion tawhna hmun a nih avangin ka tan chuan hmun dang nen a inang thei lo.

"Grand Slam hmasa ber khelh hmain thla hnih pawh a awm tling leh tawh lo a ni a, tunah chuan title lak leh chakin ka tuihal leh tawh hle," tiin a sawi a, major title la hnem ber nih chu a duhthusam a nih thu a sawi bawk.

Tun dinhmunah Rafael Nadal-a'n Grand Slam nomawi 22 a nei tawh a, ani aia nei hnem an awm lo. Amah hnaih bertu chu Djokovic hi a ni, player ropui pahnih hi nakkum January thlaa khelh tur Australian Open ti ngaihnawm zualtu an ni ngei ang.