Kan beisei loh thil a ni - Messi

Lionel Messi-a'n goal nen World Cup bul a ṭan a, mahse second half tir lama an tlarhnung phui lo tuarin a tawpah an mualpho. Argentina captain chuan an chunga thil thleng chu an rin loh leh beisei phak loh a nih thu a sawi.

Messi chuan, "Chhuanlam siam tur a awm lo, a hma aiin kan ṭang ho nasa zual zawk tur tihna a ni mai. Kan team hi kan ṭha tawk a, hun rei tak chhung tlawm nei loin kan kaltluang thei, khatiang reng tur emaw kha kan ti ang tih a hlauhawm.

"Chak lo thei kan ni tih a takin kan hmu a, mimal ni loin team pawimawhna kan hre thar leh tur a ni. Thil thleng hi ka duh leh beisei ang a ni lo, chutih rualin engkim mai hi chhan nei loin a thleng ngai lo, kan hmabak chu kan kuta awm leh mawhphurhna a ni," tiin a sawi.

Paris Saint Germain forward hi kum 35 mi a ni tawh, atan chuan World Cup hnuhnung ber a ni dawn a, football a khelh laiah pawh a hun tawp lam a ni tawh bawk, atan chuan World Cup nomawi beiseina awmchhun a ni tawh.

An chetsual chung-chang sawiin Argentina captain chuan, "Minute nga chhungin goal hnih an khung a ni a, hriatthiam a harsa khawp mai. Target zawna an shot pahnih a lut miau mai si a, keini lam lahin kan khung belh thei lo.

"Hun hrasa leh hrehawm kan tawng a, kan match khelh hmabak pahnihah chuan kan chak ngei tawh tur a ni ang," tiin a sawi a, an coach Lionel Scaloni chungah rinna an nghat ngam tih a sawi lang bawk.