Chak nei lo Highlander khelmualah Mumbai

Indian Super League khelh mekah Mumbai City chuan match sarih khel tawhin, point 15 an nei mek a, hetihlai hian NorthEast United chuan match ruk khelh tawhah point an la hmu miah lo thung!

Mumbai City tum ber chu champion a ni a, NorthEast erawh a mawngphaha season khar loh hram a ni thung - Highlander hi match ruk an khelhah an tlawm vek avangin playoff beisei chi a ni tawh lo a, mualpho lohna tura khelh a ngai tawh.

Highlander hian tun season ISL-ah goal hnih chiah an la khung a, an lamah goal 13 a lut tawh thung - goal chhuah hnem ber leh goal khung tlem ber an ni mek!

Guwahati club hian an manganna ata khai chhuak turin Colombian striker Wilmar Jordan an lalut thar a, kum 32 mi striker hian an buaina a chinfel sak an beisei ang.

Wilmar Jordan hian South Korean K League, UAE Pro League leh Chinese Super League thlenga a lo khelh tawh avangin Asian football-ah a mikhual lo a, he thu buatsaih a nih lai hian zaninah a inlan dawn leh dawn loh a hriat loh.

Mumbai hian Mizo player Lallianzuala Chhangte leh Lalengmawia Ralte (Apuia) an kawl a, Mumbai club-ah hmun pawimawh an chang phak ve ve - zaninah pawh inlan tura beisei an ni.

Lianzuala hian tun season-ah match sarih a khelh aṭangin goal thum a khung tawh a, Lunglei tlangval hian ISL-ah NorthEast United aṭangin bul ṭan mah se Highlander-ah rin a hlawh lo a, season khat chhungin minute 21 chiah a khel - goal khung a châk khawp ang.

Apuia'n Lianzuala ang thoin Mumbai tan match sarih a khel vek a, goal khat a khung tawh - Vaivakawn tlangval hi Mumbai tan midfield-ah innghahna a ni.

NorthEast-in Mizoram player pali an kawl a, midfielder Emanuel Lalchhanchhuaha (5 matches), defender Joe Zoherliana (4) leh forward Rochharzela (4) ten khelhna hmun an chang ṭhin a, hliam vangin R. Laldanmawia chu hmuh tur a la awm lo thung.